KOVALIMA, 03 Setembru 2025 (TATOLI) –Munisípiu Kovalima hanesan área potensiál atu hasa’e produsaun hare-kulit iha postu administrativu haat iha fulan ne’e, sa’e ba tonelada 3.013.
“Ha’u hakarak dehan produsaun hare-kulit ne’e sa’e maka’as kompara ho produsaun iha 2024 ne’e , tanba agrikultór sira 2025 ne’e hasa’e produsaun hare-kulit tonelada 3,13 “, Xefe Departamentu programa extensaun Agrikola, Filomeno Saldanha, relata dadus ne’e ba TATOLI, iha sentru Sanfuk, ohin.
Razaun agrikultór hasa’e produsaun makaas tanba iha Kovalima 2025 ne’e, halai natar ektare hamutuk 2,785 mai husi postu administrativu Suai natar ektare hamutuk 636, Zumalai ektare 2.080, Tilomar ektare 11 no Fatumea ektare 58.
Ho totál natar ektare 2,785 kada ektare agrikultór sira hasa’e produsaun natar kada ektare nia produsaun bele atinji natar tonelada 3,5 nune’e husi postu administrativu haat mak hanesan Suai, Zumalai,Tilomar no Fatumea ne’e produsaun komoditi hare-kulit hamutuk tonelada 3.13.
Xefe Filomeno ne’e dehan katak iha tinan ne’e produsaun komoditi hare kulit produsaun sa’e liu kompara 2024, tanba haree ba udan been no irrigasaun di’ak bainhira irrigasaun aat husi Ministériu Agrikultura, Pekuária, Peska no Floresta (MAPPF) pronto atu apoiu natar-nain hodi hadi’a kanalizasaun bee atu distribui ba natar hodi hasa’e produsaun hare-kulit .
Ho nune’e, Agikultór sira iha Kovalima kada tinan halai natar ba époka dahuluk de’it ,ba époka ba daruak agikultór sira la halai natar tanba razaun bee la sufisente atu distribui bee ba natar atu hasa’e produsaun hare-kulit iha époka ba daruak .
“Ita hatene katak agrikultór sira iha postu administrativu Suai ne’e bainhira halai natar depende de’it ba udan been ho nia razaun tanba bee la sufisiente atu distribui ba natar nune’e bele hasa’e produsaun komoditi hare-kulit ba époka daruak ni’an,” nia hatutan.
Notisia relevante:Populasaun Covalima presiza hasa’e produsaun hare-kulit
Jornalista: Celestina Teles
Editór: Florencio Miranda Ximenes
