DILI, 04 Setembru 2025 (TATOLI)—Autoridade Munisípiu Manufahi entrega ona rai ba Governu liuhusi Ministériu Saúde hodi halo kontrusaun ba Ospitál Munisípial tuir padraun internasionál.
Notísia Relevante: MS hahú prepara dezeñu ba konstrusaun ospitál andar 10 iha Manufahi-Ermera
Ministra Saúde, Élia dos Reis Amaral hateten los duni iha loron 01 fulan-Setembru tinan 2025, Ministériu Saúde simu ona rai husi Autoridade Munisípiu Manufahi atu halo kontrusaun ba Ospitál Munisípial tuir padraun Internasionál.
“Loos duni, ita agradese ba komunidade Manufahi nian tanba ho fuan tomak ne’ebé mak entrega ona rai ba Ministériu Saúde. Ita hatene katak iha aloka ona orsamentu ba harii kontrusaun novu ospitál Munisípal ba padraun internasionál ba iha Munisípiu Manufahi,” Ministra Saúde, Élia dos Reis Amaral hateten ba lornalista sira hafoin Partisipa Konsellu Ministru, ohin.
Nia esplika, daudaun ne’e prosesu la’o hela tuir nia dalan tanba agora iha ezbosu dezeñu maibé ida-ne’e depende ba dezeñu sira-ne’ebé mak atu kompete husi empreza sira.
“Prosesu la’o tuir dalan ne’ebé mak iha, ita halo ona agora ezbosu kona-ba ezbosu dezeñu ida, maibé depende ba iha dezeñu sira-ne’ebé mak atu kompete husi empreza sira, depois ita hein nia rezultadu tuir mai,” nia esplika.
Nia informa, polítika Ministériu Saúde nia atu halo lansamentu kontrusaun ospitál estandar internasionál iha tinan ida-ne’e
Nia haktuir, rai ne’ebé mak Autoridade Munisípiu Manufahi entrega mak iha Postu Administrativu Same.
“Rai ne’ebé mak sira Autoridade Munisípiu Manufahi entrega mak iha parte Luak nian, totál ektare 20,” nia dehan.
Notísia Relevante: Governu sei harii ospitál munisípál estandar internasionál iha Manufahi-Ermera
Jornalista : Feliciddade Ximenes
Editór : Cancio Ximenes
