DILI, 09 Setembru 2025 (TATOLI)—Diretór Kompañia Bobolait, Lda, Carlito Pereira informa Empreza Bobolait hein Governu aprova proposta kona-ba estátua ne’ebé atu tau iha Memoriál 12 Novembru Santa Krús.
“Ami hein de’it estátua maibé to’o agora seidauk aprova. Ida-ne’e kompeténsia Governu nian,” nia dehan ba TATOLI via telefónika, Tersa ne’e.
Nia dehan serbisu seluk hotu ona, hein mak estátua ne’e. Entaun iha momentu ne’e seidauk bele ko’alia nia progresu tanba progresu boot ne’e mak iha estátua ne’e.
“Ita halo lutu (pagar) hotu ona. Agora problema ida mak dalan ba Saudozu Sebastião Gomes nia rate ne’e presiza halo mamuk. Maibé, to’o agora rate seidauk book,” Carlito informa.
Diretór Kompañia Bobolait akresenta tan katak kuandu la aprova sira aproxima nafatin Governu, oinsá bele finaliza.
Notísia relevante: MAKLN hein rezultadu konstrusaun estátua Memoriál 12 Novembru molok foti desizaun
Carlito lembra katak natoon halo fiskalizasaun iha Portugál ne’ebá, Komisaun Nasionál Aprovizionamentu (CNA), Komité 12 Novembru mak bá maibé la inklui Ajénsia Dezenvolvimentu Nasionál (ADN) ho Ministériu Obra Públika (MOP) entaun ida-ne’e kuandu submete fali dokumentu ba MOP no ADN la hetan aprovasaun.
“Ida-ne’e dudu ba-mai afeta mak ba ami ne’ebé halo serbisu,” nia haktuir.
Governu aloka orsamentu konstrusaun ba monumentu Santa Krús ka Memoriál 12 Novembru ne’e hamutuk $1.385.389,88.
“Ita iha orsamentu adisionál tanba uluk osan iha $1.385.389,88 no agora sa’e ba milliaun $3.7-resin. Depoiz osan ne’ebé atu sosa estátua ne’e milliaun $1.800,” Carlito esplika.
Konstrusaun hahú iha loron-22 Setembru 2021 to’o 22 Setembru 2022 maibé seidauk konkluidu, nune’e Governu liuhusi Ministériu Asuntu Kombatente Libertasaun Nasionál (MAKLN) prolonga to’o tinan 2023 maibé seidauk hetan konkluzaun.
Entretantu, Sekretáriu Estadu Asuntu Veteranu, César dos Santos da Silva “Merak” hateten maski projetu tarde maibé Governu nafatin fó konfiansa ba Empreza Bobolait hodi kontinua projetu referidu.
“To’o agora progresu fíziku foin atinje pursentu 45, tanba implikasaun oioin,” Merak dehan.
Nia haktuir Komité 12 Novembru hakarak estátua ne’e maihusi Portugal tanba liga ho istória Portugál ho Timor ne’e, enkuantu Empreza Bobolait hakarak prodús estátua iha Xina.
“Nune’e, atu hanoin nafatin istória ne’e, maibé tenke iha mós desizaun husi Konsellu Administrasaun Fundu Infraestrutura (KAFI). Iha 15 Jullu tinan kotuk, ekipa konjunta entre ADN, Ministériu no Komité 12 Novembru bá Portugál hodi observa modelu estátua. To’o agora hein de’it hosi ADN maibé seidauk iha desizaun,” nia tenik.
Jornalista: Osória Marques
Editór: Xisto Freitas da Piedade
