DILI, 01 agostu 2024 (TATOLI)–Governu liuhusi Ministériu Asuntu Kombatente Libertasaaun Nasionál (MAKLN) hein ekipa Komité 12 Novembru (K12N) no empreza Bobolait nia rezultadu observasaun konstrusaun estátua iha Portugal molok foti desizaun ba konstrusaun Memoriál 12 Novembru iha Santa Crúz.
“Ekipa Komité 12 Novembru bá ona Portugal hodi haree fábrika ne’ebé atu harii estátua, maibé ekipa referida seidauk mai hato’o ninia rezultadu. Tanba ne’e mak ita dehan seidauk bele finaliza iha tinan ne’e,” Sekretáriu Estadu Veteranu, César da Silva, informa ba Agência Tatoli, iha ninia knaar fatin, Caicoli, kinta ne’e.
Tuir governante ne’e, konstrusaun Memoriál 12 Novembru seidauk finaliza tanba iha dezentendimentu entre K12N ho empreza Bobolait.
“Pur ezemplu ita fó projetu ne’e empreza hala’o tiha serbisu maibé iha difikuldade barak mak mosu iha ne’ebá. Depois husi Komité 12 Novembru, hanesan empreza atu halo ida-ne’e, sira dehan tenke la’o tuir ida-ne’e. Entaun, ami rona de’it husi parte rua ne’e hotu. Sira rasik kria problema, ezemplu hakarak loke dalan husi Pai Nosso ba to’o Saudozu Sebastião Gomes nia rate. Sira hakarak sobu rate lubuk ida iha dalan. Agora atu sobu ne’e tenke halo négosiu ho rate nia família. Ida-ne’e sai fatór ba implika progresu fíziku projetu ne’e,” nia haktuir.
Sekretáriu Estadu dehan, parte Komité mak bele hatene kona-ba sobu rate, maibé sujere halo ponte oan ida husi leten, maibé sira lakohi tenke sobu rate.
Notísia relevante : Empreza responsável konstrusaun Memoriál 12 Novembru hein desizaun liberta espasu
Iha sorin seluk, Diretór empreza Bobolait, Lda, Carlito Pereira, hateten, ekipa responsável sira seidauk halo konstrusaun estátua 12 Novembru iha Portugal.
“Estátua ne’ebé planu iha Portugal seidauk iha progresu tanba seidauk hahú halo. Ami foin mak bá haree no seidauk deside husi empreza tolu, ida-ne’ebé mak manán atu harii estátua ida-ne’e. Ekipa foin to’o iha sábadu ne’e no sei presiza halo evaluasaun nune’e deside sé mak atu halo,” nia akresenta.
Husi parte empreza responsável, falta azuleju ne’ebé halo iha Behau mak seidauk hotu no hein mós desizaun husi Komité 12 Novembru no munisípiu Dili.
“Ita hein sira deside sobu tiha lai mak ita bele nahe azuleju. Ami mak hein no hein. Ita hein de’it mak orientasaun hosi Komité 12 Novembru no dono do projeto ida-ne’e. Tanba ne’e mak ha’u atu dehan ami nunka abandona projetu ne’e, ami ezekuta tuir orden no rezultadu enkontru husi parte rua mak seidauk iha solusaun,” Diretór empreza, tenik.
Ho dezentendimentu entre parte rua ne’e maka projetu ne’e rasik seidauk bele finaliza no dalaruma bele to’o tinan oin.
Kontratór Empreza Bobolait Unipedsoál, Lda hanesan responsável ba konstrusaun Memoriál 12 Novembru, ho nia kustu ba obra $1.385.389,88, ho durasaun serbisu tinan-ida, hahú serbisu iha loron 22 setembru 2021 no tuir previzaun sei ramata iha loron 22 setembru 2022, maibé la konsege finaliza no Governu kontinua estende to’o tinan 2023 maibé seidauk finaliza nafatin tanba hein hela prosesu produsaun estátua iha Portugál.
Jornalista : Osória Marques
Editora : Julia Chatarina
