DILI, 09 Setembru 2025 (TATOLI)—Primeiru Ministru Kayrala Xanana Gusmão hamutuk ho Ministéria Obras Públikas Samuel Marçal, segunda ne’e, ofisialmente lansa drainajen D4 ne’ebé sei implementa iha área Kaikoli tun ba parte Portu Dili nian, atu garante 99% bele rezolve inundasaun iha Kapitál Dili bainhira udan monu rai.
Notísia Relevante: Evita risku inundasaun, Governu kontinua halo limpeza iha mota-ninin
Ministru Obra Públika, Samuel Marçal, hateten kada tinan iha Dili laran bainhira inundasaun ne’e ninia problema mak drainajen nia medida la sufisiente hodi akumula volume bee. Estudu ida-ne’e, antes ne’e, sira halo ona ho konsultan Portugeza maibé seidauk implementa no tinan ida-ne’e mak foin halo revizaun uitoan, hafoin halo drainajen para bele akumula volume bee husi Kaikoli, Vila Verde no Audian nian.
“Kada tinan sempre akontese inundasaun ne’e tanba bee nia volume boot no drainajen nia medida ki’ik la bele asegura bee sai ho di’ak, entaun bee intupidu hodi afeta ba komunidade nia uma no nalihun iha Estrada,” Governante ne’e informa ba jornalista sira iha Portu Dili, segunda (08 Setembru 2029 ne’e.
Ministru ne’e hatutan, agora uza tipu drainajen D4 ne’e bele rezolve ona inundasaun iha parte Kaikoli, Vila Verde no Audian tanba úniku dalan ba tasi liuhusi Portu ne’e ona, maske la rezolve 100% maibé bele to’o 99%.
“Drainajen ne’e sei monta iha diresaun justisa no UNTL nian no ita sei monta mós filtrasaun iha ponte okos ne’e, nune’e bele ta’es bee mak tuun husi drainajen maibé fo’er hanesan masa no plástiku sira, espera bele aselera lalais para to’o fulan-Janeiru 2026 bele finaliza, nia dehan.
Primeiru-Ministru, Kay Rala Xanana Gusmão, hateten atu bele hatene drainajen ne’ebé iha daudaun ne’e mak iha área EDTL no Komandu Jeral PNTL nia mak alerta ba drainajen sentrál iha ponte semáforu entre UNTL Liseu no Ministériu Justisa nian, hafoin ne’e bee alerta tuun ba tasi-ibun husi entrada boot mosu iha portu Dili.
“Entaun, bee husi drainajen rua ne’e sei hasoru malu iha parte UNTL liseu no Ministéria Justisa nian mak foin tuun fali ba tasi-ibun, ne’e mak baibain mosu bee nalihun maka’as ne’e tanba intupidu,” nia esplika.
Enkuantu drainajen ne’e ho medida naruk metru 800 no nia luan ne’e metro lima (5), no projetu ne’e sei implementa husi kompañia Karya Timor-Leste, Lda, ho durasaun fulan neen no totál orsamentu hamutuk rihun $100-resin.
Notísia Relevante: Fatin lima iha Dili sai risku ba inundasaun
Jornalista : Alexandra da Costa
Editór : Cancio Ximenes
