DILI, 07 Maiu 2025 (TATOLI) – Governu liuhusi Sekretáriu Estadu Asuntu Toponímia no Organizasaun Urbana (SEATOU) hamutuk ho ekipa konjunta kontinua halo limpeza ba komunidade afetadu ba inundasaun sira-nia uma ne’ebé pertense iha mota-laran, aldeia Moris Foun, suku Komoro, ohin.
Uma sira-ne’ebé SEATOU ho ekipa halo limpeza no harahun ne’e, tanba komunidade sira-ne’e la autoriza ona atu hela iha fatin referidu, ho razaun fó risku ba sira-nia aan bainhira tempu-udan.
Komunidade hamutuk na’in-183 hotu mós Governu liuhusi servisu MAE, SEATOU no APC organiza antes ne’e evakua sira ba iha Karantina Tasi-tolu, enkuantu horiseik dezloka ona sira ba ida-idak nia Munisípiu.
“Atividade ohin loron nian ami mai halo limpeza iha mota-laran ba barraka sira-ne’ebé maka durante fulan rua nia laran bee tama ba komunidade sira-nia fatin, nune’e ami muda sira ba iha Karantina Tasi-tolu durante fulan rua ho balun nia laran”, Sekretáriu Estadu Asuntu Toponímia no Organizasaun Urbana, Germano Santa Brites Dias, informa ba jornalista sira iha mota-laran aldeia Moris Foun, suku Komoro, ohin.
Sekretáriu Estadu ne’e hateten, atendimentu Governu nian haree husi povu ki’ik sira-ne’ebé hetan afetadu husi mota iha fulan hirak liubá no horiseik konsege rezolve ona maske iha dezintendimentu entre membru parlamentu ne’ebé halo intervensaun iha Karantina.
“Maibé buat ida hanaran diskusaun; demokrásia, ne’e normál. Hafoin ne’e iha horiseik lorokraik ita hamutuk ho ekipa konjunta konsege mobiliza kedas sira hamamuk fatin no fila ba ida-idak nia Munisípiu”, nia haktuir.
Nune’e, governante ne’e informa katak ohin SEATOU hamutuk ho ekipa MOP no PNTL kontinua apoia hodi hamoos barraka sira iha mota-laran hodi evita komunidade sira atu kontinua hela iha fatin ne’e tanba ne’e mak ohin MOP hatuun hela mákina eskavatór hodi halo servisu husi dadeer to’o agora.
“Ami hakaas aan para iha semana ida-ne’e nia laran fatin ne’e tenke moos, atu nune’e Governu bele haree fali servisu seluk iha Munisípiu seluk, nune’e ita bele haree katak iha Munisípiu Dili menus ona risku ba ita-nia populasaun”, nia dehan.
SEATOU aumenta tan, atu haree fali sira hela iha mota-ibun sira-ne’e, ita tenke haka’as aan, no nafatin husu komunidade sira atu bele koopera ho Governu nia servisu ida-ne’e.
“Ohin ita mai haree fali komunidade balun nafatin hela iha uma ne’e, tanba horiseik ita-nia ekipa sira tula sira mai, sira bosok fali kondotór sira, maske antes ne’e ita orienta atu hatuun sira iha Manleuana no Komoro maibé realidade sira manda kondutór hatuun sira iha estrada públiku hodi fila fali ba mota laran”, nia haktuir.
Sekretáriu Estadu Germano Santa Brites Dias akresenta, “Entaun ohin ita kontinua fó servisu ba komunidade sira atu muda rasik sira-nia sasan, no sei la oferese transporte gratuita ba sira atu muda. Sira buka rasik transporte tanba sira-nia servisu mak horseik organiza hodi mobiliza komunidade sira. Ohin sira bele ba buka rasik no muda rasik sira-nia sasan. Ita ajuda tau sasan iha nia fatin ne’ebé maka seguru para mákina eskavatór bele halo ninia servisu”, governante ne’e énfaze.
Tuir observasaun jornalista nian iha terrenu nota katak iha komunidade na’in 10-resin mak kontinua hela fali iha uma ne’ebé Governu liuhusi SEATOU la autoriza ne’e maibé SEATOU tuun direta hodi orienta sira hahamuk fatin, no eskavatór mós kontinua harahun uma sira iha mota-ninin.
Jornalista: Alexandra da Costa
Editór: Rafael Ximenes de A. Belo
