DILI, 26 Marsu 2025 (TATOLI) – Diresaun-Jerál Estrada Ponte Prevensaun no Kontrolu Seia Ministériu Obra Públika (MOP) identifika fatin lima iha kapitál sai risku boot ba inundasaun, liuliu iha tempu udan.
Diretora Nasionál Manutensaun no Konservasaun Via Rodoviária MOP, Letígia Hanjam Corbafo, informa fatin sira ne’e mak Bairru Pité iha Plur oin, Kaikoli, Katedrál parte Ministériu Edukasaun nian tun mai, rotunda Nicolau Lobato, no Balide iha Eskola Sekundária 04 Setembru nia oin.
“Parte Nicolau Lobato nian ida-ne’e antes seidauk halo drainajen, iha ne’ebá tempu udan hamosu inundasaun, maibé hafoin ami iha obra hadi’a drainajen, agora tempu udan, bee nalihun másimu oras rua ne’e tama hotu ba drainajen laran. Importante mak ita rotina hamoos valeta sira ne’e”, Letígia Hanjam dehan ba TATOLI, ohin.
Iha Bairru Pité nian tau tipu emerjénsia no daudaun empreza Montana Di’ak halo hela kontrusaun ba drainajen no besik konklui. Iha Eskola Sekundária 04 Setembru Balide no Katedrál nian tékniku sira sei haree no halo análize molok hadi’a.
“Sira ne’e hotu iha ona planu laran, ita sei hadi’a hotu tinan ne’e hodi redús inundasaun no proteje estrutura estrada nian”, dehan.
Nia esplika, bainhira tempu udan, ekipa téknika kontinua halo identifikasaun bá fatin sira ne’ebé mosu inundasaun no hafoin udan para sira haree nia kauza sira.
Tuir nia, iha Dili, fatin sira ne’ebé identifika akontese inundasaun ki’ik sira aleinde fatin risku lima ne’e nia kauza tanba valeta sira mak ki’ik liu no volume bee boot. Iha área balun valeta di’ak, maibé fo’er taka metin maka bee labele tama valeta no suli tuir fali ba estrada.
“Husi kauza sira ne’e, udan para ita hamoos tiha fo’er mak bee tama ba drainajen laran. Iha fatin balun valeta nakoku ho lixu entaun bee labele halai tuir-nia dalan. Sira ne’e hotu iha planu atu halo manutensaun, maibé barak kuaze hadi’a de’it mak nia inglet presiza halo boot liután”, realsa.
Solusaun ne’ebé daudaun Governu foti molok halo manutensaun ba drainajen sira ne’e mak MOP kontrata empreza Dili United hodi hamoos valeta sira ne’ebé intupidu ho lixu iha Dili.
Notísia relevante: Governu kontinua reorganiza kapitál prevene inundasaun
Jornalista: Arminda Fonseca
Editora: Maria Auxiliadora
