VIKEKE, 17 Setembru 2025 (TATOLI) – Koordenadór Eletrisidade Timor-Leste, Empreza Públika (EDTL, E.P) Munisípiu Vikeke, Eduardo Sarmento, klarifika projetu eletrifikasaun ba Suku Uma-Ki’ik, Postu Administrativu Vikeke Vila, Munisípiu Vikeke, daudaun ne’e empreza Uka-Aba Unipessoal Lda halo hela akizisaun ba materiál iha Surabaia, Indonézia.
“Kona-ba preokupasaun ita-nia abitante aldeia tolu husi Suku Uma-Ki’ik ba obra eletrifikasaun ne’e, ha’u komunika ona ba Diretór Empreza Uka-Aba Unipessoal Lda, dehan daudaun ne’e, halo kompra materiál eletrifikasaun nian iha Surabaia. Tanba ne’e, empreza seidauk kontinua implementa sira-nia obra ne’e ba Suku Uma-Ki’ik”, Eduardo Sarmento, dehan ba TATOLI, iha Postu Vikeke, Kuarta ne’e.
Nia rekoñese, obra eletrifikasaun ba Suku Uma-Ki’ik serbisu paradu fulan lima ona no ninia progresu foin mak atinje 23%, husi pursentu ne’e empreza foin harii ai-rin (poste) eletrisidade.
“Ami hanesan haree de’it obra karik mosu problema ruma iha fatin serbisu, ami ba rezolve. Maibé ba prosesu kontratu ne’e parte nasionál mak halo ho empreza, parte nasionál mós kontinua koordena ho empreza hodi kontinua sira-nia serbisu,” nia realsa.
Nune’e nia dehan, kontinua obra bainhira mak implementa karik parte EDTL, E.P Munisípiu Vikeke seidauk hatene informasaun serteza husi empreza implementadór.
“Obra ne’e bainhira mak kontinua karik ami mós seidauk hatene loos. Ba oin ami kontinua koordena nafatin ho nasionál, atu koordena ho empreza. Loloos ne’e konklui iha fulan tolu, maibé seidauk konkluidu ne’e kompeténsia parte empreza, esforsu oinsá mak finaliza obra hodi populasaun sira bele asesu ba naroman,” nia subliña.
Projetu eletrifikasaun husi EDTL, E.P ho númeru kontratu 004/wk/EDTL-EP-2025, valór kontratu $247.903,60. Projetu referidu implementa husi Empreza Uka-Aba Unipessoal Lda, durasaun fulan tolu. Enkuantu obra eletrifikasaun ne’e bainhira konklui sei benifísia ba populasaun Suku Uma-Ki’ik kompostu husi aldeia tolu (3) hanesan Macadean, Aina Uain, no Maroman ho totál uma-kain hamutuk 96.
Notísia relevante: https://tatoli.tl/2025/09/16/abitante-uma-kiik-preokupa-empreza-uca-aba-abandona-projetu-eletrifikasaun/
Jornalista: Vitorino Lopez da Costa
Editór: Rafael Ximenes de A. Belo
