VIKEKE, 03 Outubru 2025 (TATOLI)–Governu liuhusi Ministériu Administrasaun Estatál (MAE) hamutuk ho Bispu Dioseze Baukau no Autoridade Munisípiu Vikeke, Sesta ne’e, inaugura Kapela Nossa Senhora Rainha do Rosário, iha Suku Builó, Postu Administrativu Ossú, Munisípiu Vikeke.
Kapela ne’e konstrui liuhusi orsamentu adisionál Programa Nasionál Dezenvolvimentu Suku (PNDS) no kontribui husi sarani sira totál hamutuk $62.306,00, ne’ebé hahú konstrui iha tinan 2024.
Bispu Leandro Maria Alves hateten tinan barak kapela ba Uabubu nian laiha, no ohin inaugura ona kapela ne’e hodibele halibur sarani sira iha Suku Uabubu.
“Ohin ita hotu halibur hamutuk iha kapela ida-ne’e, hodi inaugura kapela ida-ne’e. Kapela sai fatin orasaun ne’e la’ós fahe ita, maibé atu halibur ita hotu-hotu, sai família ida de’it. Sarani hotu-hotu fó liman ba-malu hodi inisia kapela ida-ne’e hahú husi liurai. Iha ita-nia fuan mak halibur malu hamutuk hanesan família ida, maski ita uma-kain ketak-katak nian, maibé ita hakarak moris hamutuk iha komunidade ida di’ak, moris hamutuk ho dame no moris hamutuk iha hakmatek nian laran,” Bispu Dioseze Baukau, Don Leandro Maria Alves hateten iha nia omília iha ámbitu inaugurasaun Kapela Uabubu.
Don Lendro afirma kapela sai fatin ida hodi hasoru-malu ho Na’i Maromak, ne’e duni sarani Uabubu tenke kontente tanba iha uma orasaun.
“Bainhira ita inisia harii kapela hatudu ita-nia saudade no dezeju ida-ne’ebé hakarak hasoru malu ho Na’i Maromak hodi ko’alia ho Maromak, ita hakarak fatin ida hakmatek hodi ko’alia buat hotu ne’ebé iha ita-nia preokupasaun no hasa’e problema ba Na’i Maromak,” nia hato’o.
Iha fatin hanesan, Ministru Administrasaun Estatál (MAE), Tomás do Rosário Cabral parabeniza populasaun Uabubu ne’ebé esforsu hodi konsege konklui obra ida-ne’e.
“Ha’u hakarak husu parabéns ba ferik ho katuas sira tanba sira mak inisia obra ida-ne’e. Durante ne’e, ha’u mai vizita ferik ho katuas sira mak lalin rai-henek no fatuk hodi halo konstrusaun, ikusmai konsege ramata obra. Tan ne’e, ohin ita hamutuk hodi halo inaugurasaun ba kapela no ida-ne’e mak Governu ninia kontribuisaun ba povu,” Governate ne’e hato’o.
Nune’e mós, Xefe Suku Uabubu, Joanico M. A da Cruz agradese ba Governu no família sira Uabubu ne’ebé fó apoiu fundu no materiál ba konstrusaun kapela Uabubu.
“Tan ne’e, ha’u agradese ba parte hotu-hotu ne’ebé fó sira-nia kontribuisaun ba konstrusaun ida-ne’e. Nune’e mós agradese ba natureza ne’ebé ajuda ami iha prosesu konstrusaun ami la hetan asidente ruma to’o kapela ne’e konkluidu,” nia subliña.
Kapela ne’e sei benefísia Suku Uabubu ho totál populasaun hamutuk 2.717 no uma-kain hamutuk 578, ne’ebé kompostu husi Aldeia Buanurak, Osogori, Lekibuti, Uailia no Letame.
Serimónia inaugurasaun ne’e populasaun Uabubu simu Governante, Bispu Dioseze Baukau no Autoridade Munisípiu Vikeke simu ho kultura Timor hodi tara tais no simu ho formatura no dansa kultura. Iha inaugurasaun ne’e hetan partisipa husi autoridade lokál, veteranu no hetan partisipa másimu husi sarani Suku Uabubu, Postu Administrativu Ossú.
Jornalista: Vitorino Lopez da Costa
Editór: Xisto Freitas da Piedade
