DILI, 14 Outubru 2025 (TATOLI)—Komandu Polísia Nasionál Timor-Leste (PNTL) submete ona ba Ministériu Públiku (MP) kona-ba kazu membru fó arma ba xineza hodi tiru iha Kaitehu, Munisipiu Likisá, foin lalais ne’e.
“Membru PNTL ne’ebé mak fó kilat no pistola hodi fó treinu ba xineza ne’e ita foti ona nia deklarasaun, ita iha evidénsia forte no ita aprezenta ona ba Ministériu Públiku,” Diretór Servisu Investigsaun Kriminál Superintendente Xefe Polísia João Belo dos Reis hateten ba Jornalista sira liuhusi konferénsia imprensa, ne’ebé hala’o iha Komandu Jerál PNTL, Kaikoli, Tersa ne’e.
Notísia relevante : Komandu PNTL dezarma no suspende membru CSP ne’ebé fasilita kilat ba xineza
Nia dehan, kona-ba kestaun sansaun disiplinar mós la’o hela, ne’ebé Polísia loke ba públiku atu hatene, katak membru sé de’it bainhira komete krime ruma ne’ebé mak la la’o tuir orintasaun no lei maka sei submete ba prosesu.
“Simplesmente ne’e komportamentu indivíduu ididak ninian, atu krime organizadu ka lae ne’e prosesu investigasaun mak determina, ne’e segredu justisa,” nia akresenta.
João Belo hatutan, bazeia ba investigasaun ba suspeitu, identifika katak momentu ne’e mai husi nia inisiativa rasik.
“Deklaraaun ninia (suspeitu), ne’e ninia komportamentu, ninia atitude rasik,” Superintendente Xefe Polísia João Belo dos Reis tenik.
Jornalista : Natalino Costa
Editora : Julia Chatarina
