DILI, 16 Outubru 2025 (TATOLI)—Organizasaun Naun Governamentál Plan Internsionál Timor-Leste (PITL) halo lansamentu ba Planu Estratéjiku Dezenvolvimentu Nasionál 2025-2030, ne’ebé destaka programa prioridade tolu (3) hanesan aproximasaun dezenvolvimentu uma-ka’in, empoderamentu adolesente ka juventude no Haforsa ekonómia rurál.
Diretora Ezekutiva Plan Internasionál, Fátima Estrela Soares, hateten ohin hanesan momentu ne’ebé importante tebes ba Plan Internasionál hodi lansa sira-nia PEDN ba tinan lima oin mai ne’e sei hahú husi 2025 to’o 2030.
“Ami-nia planu estratéjia ida-ne’e la’ós dokumentu de’it maibé hanesan mudansa servisu no saida mak ami pesiza halo hodi tulun Governu no komunidade,” Diretora ne’e informa ba jornalista sira iha Hotel Timor, Kolmera, ohin.
Nia haktuir, maske durante ne’e iha implementasaun servisu sira sempre hetan difikuldade oioin liuliu liga ba infraestrutura estrada no ponte, tanba sira labele mellora liután sira-nia advokásia ba komunidade iha área rural tanba dalan ladi’ak para asesu.
“Maibé ho kestaun sira-ne’e iha atividade lubuk ida mak ami halo ona ajuda komunidade iha área rurál, hanesan halo eskola, hadi’a estrada rurál balun no konstrui ponte ki’ikoan ba komunidade hodi asesu,” nia dehan.
Nune’e, nia informa Planu Estratéjia Dezenvolvimentu Nasionál (PEDN) 2025-2030 sei foka ba programa prioridade tolu mak dahuluk halo aproximasaun dezenvolvimentu uma ka’in ne’ebé integra setór importante sira hanesan edukasaun, saúde, infraestrutura,
Daruak, epoderamentu adolesente/juventude, ida ne’e oinsá mak empodera juventude sira atu espresa sira-nia abilidade hodi sai lideransa, tanba juventude agora la’ós sai de’it benefisiáriu maibé sai parseiru lideransa
Datoluk, haforsa ekonómia rural liuliu ida-ne’e sei haree ba mudansa klimátika ne’ebé rejilénsia liu no oinsá mak komunidade hatene adapta hodi prepara oinsá atu redús dezastre.
Reprezentante Governu liuhusi Sekretária Estadu Igualdade Inkluzaun (SEII), Elvina de Sousa, hateten hanesan reprezentante Governu konstitusionál da-sia iha kompromisu atu kontinua apoiu nafatin programa husi organizasaun naun governamentál sira liuliu Plan Internasionál Timor-Leste nia prinsípiu hodi halo advokasia ba direitu ema-nian no promove empoderamentu juventude no labarik ba futuru.
“Ha’u orgullu tebes ba Plan Internasional nia inisiativa husi programa ida-ne’e tanba bele ajuda ajusta mós programa Governu nian,” nia hateten.
Tamba ne’e, nia iha esperansa katak ba oin atu Plan Intentesionál kontinua iha kompromisu ne’ebé forte hodi implementa ninia programa prioridade sira iha tinan lima oin mai.
Enkuantu, iha atividade ne’e hetan partisipasaun husi entidade Governu, parseiru dezenvolvimentu nasionál no internasionál, autoridade seguransa PNTL, lider komunitária, membru Plan Internasional sira inklui mós juventude sira.
Jornalista : Alexandra da Costa
Editór : Cancio Ximenes
