DILI, 17 Outubru 2025 (TATOLI)—Arsebispu Arkidioseze Metropolitana Dili, Dom. Virgílio Kardeál do Carmo da Silva, SDB, husu ba joven sira hotu atu labele tau prioridade liu ba halimar telemóvel maibé tenke halo orasaun hodi hametin ida-idak nia fiar nu’udar sarani katólika loloos.
Atu hametin sarani ida-idak ninia devosaun entaun presiza halo orasaun, la presiza halo orasaun ne’ebé naruk maibé importante ho fuan no laran tomak hodi kesi metin relasaun entre Maromak ho ema ida-idak nia moris.
“Maibé joven sira barak liu gosta halimar mak telemóvel. Orasaun ne’e, importante atu hametin fiar. Garante katak bainhira ita halo orasaun, entaun ita la mesak maibé ita sempre hetan akompaña husi Maromak nia prezensa,” Arsebispu relata ba jornalista sira iha edifísiu IJEADI, Hera, kinta ne’e.
Amu-lulik ne’e hatutan, tanba agora ne’e fulan-Outobru hanesan fulan rosariu nian ne’ebé fó hanoin ba sarani katólika sira hotu iha mundu tomak, atu hanoin kona-ba na’in feto nia imajen mak tenke reza, tanba ida-ne’e dalan ida-ne’ebé atu hakbesik ema ho Maromak.
“Hanesan mós bainhira ita hetan susar ruma iha fatin fuik ida, ita sempre tara tersu ka halo sinál krús. Ne’e signifika, ita iha fiar ne’ebé metin ba Maromak hodi husu ninia tulun no presiza nia sai seguransa hodi proteje ita,” nia dehan.
Jornalista : Alexandra da Costa
Editór : Cancio Ximenes
