VIKEKE, 29 Outubru 2025 (TATOLI)—Xefe Suku Ossorua, Postu Administrativu Ossú, Munisípiu Vikeke, Eduardo A. Freitas solisita Ministériu Saúde (MS) atu konstrui postu saúde ba suku Ossorua tanba durante ne’e suku laiha postu saúde hodi fó atendimentu ba populasaun ne’ebé moras.
“Tuir polítika Ministériu Saúde katak setór saúde ba suku hotu-hotu iha territóriu Timor-Leste tenke iha fasilidade saúde hanesan postu saúde ida no kolokasaun pesoal saúde, maibé durante ita ukun aan tinan 23 ona ami laiha postu saúde. Tanba ne’e, ha’u husu ministériu konstrui ami-nia fasilidade saúde, atu ami-nia populasaun moras karik lalika ba dook,” Eduardo ba TATOLI iha Postu Vikeke Vila, Kuarta ne’e.
Autoridade Ossorua ne’e hatutan parte autoridade suku relata beibeik asuntu ne’e ba Ministériu Saúde maibé to’o agora seiduak iha resposta ruma.
“Liga ba preokupasaun ba fasilidade postu saúde ne’e ha’u hato’o ona ba Ministériu Saúde maibé seidauk hatán ami-nia proposta. Iha tinan kotuk, 2024, ha’u rona husi diretór saúde sira katak postu saúde ba ami-nia suku tama ba grande projetu ne’ebé sei realiza 2025-2026, maibé ita tama ona 2025 seiduk realiza. Tan ne’e, ha’u husu bainhira mak bele realiza konstrusaun postu saúde ne’e?,” nia kestiona.
Eduardo haktuir durante ne’e populasaun tenke ba asesu postu saúde husi suku viziñu hanesan Suku Uaguia no Loihunu, más populasaun ne’ebé transporte iha, sira bá rasik Sentru Saúde Ossú.
Hatán ba preokupasaun ne’e, Diretór Servisu Munisípiu Vikeke, Aljaksono S. Maia, hateten Servisu Saúde Munisipál relata ona asuntu ne’e ba MS nune’e obra ba konstrusaun postu saúde Suku Ossorua nian MS aprezenta ona ba Komisaun Nasionál Aprovizionamentu (CNA-sigla portugeza) no Ajénsia Dezenvolvimentu Nasionál (ADN).
“Relasiona ho preokupasaun ne’e, foin lalais ha’u halo konfirmasaun ba Unidade Grande Projetu husi MS katak parte ADN seidauk enkamiña ba CNA. Prosesu sira-ne’e hotu sei entrega hikas ba MS hafoin loke prosesu konkursu,” nia hato’o.
Tuir dadus, Suku Ossorua iha aldeia hamutuk ualu (8), totál populasaun 2.510 no uma-kain 560.
Jornalista: Vitorino Lopes da Costa
Editór: Xisto Freitas da Piedade
