DILI, 05 Novembru 2025 (TATOLI)—Governu hatuur oseanu nu’udar rekursu potensiál ekonómiku Timor-Leste nian, tanba ne’e tenke proteje no halo konservasaun ekosistema hodi garante dezenvolvimentu ne’ebé sustentável.
Notísia Relevante: Timor-Leste no Fundasaun Oseanu Azúl aborda programa avaliasaun ba biodiversidade mariña
Primeiru-Ministru, Kay Rala Xanana Gusmão, hateten ida-ne’e mós define hanesan programa prioridade Governu nian ba periodu 2025-2035 hodi aumenta investimentu ekonómiku rai-laran liuhusi biodiversidade ne’ebé iha.
“Timor-Leste investe daudaun iha programa reziliénsia klimátika, no komprometidu ho meta internasionál kona-ba sustentabilidade ho promosaun ba konservasaun biodiversidade inklui kriasaun fundu verde klima nian ida-ne’ebé sei kapitaliza iha orsamentu Estadu ida-ne’e,” Primeiru-Ministru hateten iha diskursu debate OJE 2026 iha faze jeneralidade iha PN, ohin.
Governu hatuur oseanu hanesan sentru atu nune’e bele prevene no redús impaktu husi alterasaun klimátika, ba benefísiu jerasaun atuál no futuru Timor-Leste nian inklui planeta tomak nian. Tanba, ekonómia azúl ne’ebé hakarak ba nasaun ida ne’e mak hanesan utiliza potensiál ekonómiku husi rekursu mariñu ba dezenvolvimentu sustentável nasionál nomós asegura protesaun ho konservasaun tasi ho ninia ekosistema.
“Tanba ne’e mak iha fulan-Junu liubá ami aprova ona roteiru integradu no incluzivu, konsubstansiadu iha polítika ho planu asaun ba promosaun ekonómia tasi nian ne’ebé reziliente no sustentável iha Timor-Leste (2025-2035) hodi halo konsulta públika alargada ho autoridade munisipál no lideransa lokál na’in-750. Atu nune’e, kualkér organizasaun ka sidadaun bele partilla ninia opiniaun kona-ba tema ida-ne’ebé importante tebe-tebes ba ita-nia rai no ba ita hotu-hotu nia moris,” Primeiru-Ministru Xanana informa.
Tanba misaun husi programa ida-ne’e hodi halo promosaun no implementasaun ekonómia azúl tanba hanesan ezemplu ida tan husi ita-nia potensiál nu’udar nasaun nia responsável no komprometidu ho dezenvolvimentu ne’ebé sustentável.
Notísia Relevante: PM Xanana apresia joven sira-nia partisipasaun durante semana oseanu
Jornalista : Alexandra da Costa
Editór : Cancio Ximenes
