VIKEKE, 08 Novembru 2025 (TATOLI) – Prezidente Asosiasaun Feto Poténsiál Vikeke, Luciana Guterres, hateten grupu hamutuk 28 mak kontinua ativu halo atividade soru-tais.
“Tais ne’ebé sira prodús baibain fa’an iha merkadu no partisipa iha expo sira. Atividade kona-ba soru-tais ne’e ita-nia feto sira mak inisiativa rasik hakarak kria no balu mak hetan fundu rotativu husi Sekretaria Estadu Igualidade (SEI) iha tinan 2020, maibé grupu balun seidauk hetan apoiu ruma”, Luciana Guterres hateten ba Tatoli, iha postu Vikeke Vila, ohin.
Nune’e nia dehan identidade tais Timór atu labele lakon, Governu presiza apoia fundu ruma atu motiva grupu soru-tais sira no Kontinua haburas sira-nia atividade.
Koordenadora Rede Soru-Tais husi munisípiu Vikeke, Celeste Guterres, hatutan grupu soru-tais iha Vikeke mai husi postu lima no totál membru ne’ebé envolve iha grupu ne’e hamutuk na’in-138 (feto no mane).
“Durante ne’e ita-nia grupu sira ativu halo produús soru-tais no tais sira-ne’ebé grupu sira prodús dalabarak fa’an iha merkadu, balu ema sosa direta iha sira no tais balu grupu sira bá fa’an iha loja Páteo, Dili. Ba oin ami kontinua promove ita-nia identidade tais Timór, atu labele lakon tanba ita ne’e hahú husi ita-nia avó sira-nia tempu. Hanesan jerasaun foun hakarak hatutan obra avó sira-nian ne’ebé sai identidade kulturál. Tan ne’e, ha’u husu feto foinsa’e sira ativu nafatin iha soru-tais, tanba daudaun ne’e tais printing husi rai-li’ur barak mak tama iha ita-nia nasaun”, nia akresenta.
Tuir nia, iha Vikeke, kada postu iha tais nia kór ketak-ketak hanesan postu Ossú, Uatulari no Uatukarbau kór hanesan no postu Vikeke no Lakluta mak hanesan.
Jornalista : Vitorino Lopez da Costa
Editora : Maria Auxilidora
