OEKUSI, 11 Novembru 2025 (TATOLI) – Juventude Mate restu Masakre Santa-Kruz, 12 Novembru 1991 husi Rejiaun Administrativa Espesiál Oekusi Ambeno (RAEOA), hanesan José Elo, Arberto Soi no Orlandus Colo hato’o sira-nia hanoin kona-ba luta juventude uluk no luta juventude agora.
Tan ne’e atu hatene liután kona-ba signifikadu no impaktu husi loron istória 12 Novembru, Ajénsia Notisioza TATOLI,I.P halo entrevista-badak ho sobrevivente sira, atu rona sira-nia hanoin kona-ba papél juventude nian.
Notísia relevante:RAEOA ajenda ona atividade prinsipál lima ba komemorasaun 12 Novembru
José Elo ho naran kódigu ‘Sikat-Leet’, informa, juventude ida agora ne’e, funu bo’ot atu matenek, tanba joven uluk, tempu ruma sei sees an ona ba kotuk, maibé joven agora ne’e tenke avansa ba oin hodi matenek atu kontinua lidera ita-nia nasaun ba oin, “ami hanesan funda de’it, maibé sira-ne’ebé hatutan mak joven agora ne’e,” nia hateten.
“Aban hot-hotu ita-nian ba joven uluk no joven agora. 12 Novembru aban, la’ós ami uluk nian mesak maibé ita hotu nian joventude Timór nia loron mak aban, ne’ebé hakerek ona ho ruin no raan,” nia heteten ba jornalista sira iha Oekusi, ohin.
“Agora ne’e demokrasia, ita ko’alia demais ba ema mós, ladun di’ak tanba ida-idak nia direitu, agora moderna ona, buat hotu kompletu motor, karreta, telemovél, entaun uza rekursu sira ne’e, investe ba eskola atu sai matenek, tanba uluk ami hahú ne’e balun la eskola no balun eskola maibé uitoan de’it maibé objetivu ida de’it ita tenke ukun rasik-aan, agora nasaun ne’e iha joven agora nia liman, kontinua ba, kontinua ho matenek,” nia fó hanoin.
Notísia relevante:“Kolega, ajuda fó hatene ba ha’u-nia apa-amá, Nina mate ona”
Juventude mate restu 12 Novembru Alberto Soi ho naran kódigu ‘Kaer-Koiz’, hateten katak, daudaun ne’e Timor-Leste komemora ona loron 12 Novembru ba dala 34 ona, iha ne’ebé joven uluk no joven agora, 12 Novembru hakerek ona ho ruin no raan, tanba ne’e juventude ida agora ne’e tenke funu maka’as atu matenek hodi kontinua lori nasaun ne’e ba oin.
Nia espera juven agora ne’e, presiza promove solidariedade ba malu hadomi malu no respeita lider sira, tanba sira mak harii nasaun ne’e to’o ohin loron goza independensia ne’e.
“Agora ita tama ona global sékulu 21 ita tenke hadomi malu, karia pas no dame, no hakribi violensi sira no konflitu oi-oin ita ita-nia rai, joventude agora ne’e nia misaun mak tenke estuda atu buka matenek prepara ba futuru. Ami liu ona mak akontese 12 Novembru ne’e uluk 1991 ne’e, joventude loriku asuwain, iha valór ona, maibé joven agora ne’e hanesan jerasaun foun, nu’udar mós joventude dezenvolvimentu, tenke haree tuir sira uluk nia ain fatin, katak save mak hadomi malu no respeita lider istóriku sira, tanba sira mak inisía prosesu luta ne’e, agora tenke prepara futuru liuhusi asesu edukasaun tenke ba eskola, tanba trata malu no odio malu laiha valór,” nia hateten.
Orlandus Colo, dehan, objetivu husi komemorasaun aban 12 Novembru 2025 ne’e, atu fó hanoin nafatin bai ta sira-ne’ebé sei moris hela.
“Tanba iha loron ne’e akontese iha tinan 1991, kolega barak mate fakar sira-nia raan iha semitériu Santa-krus, sira-nia mate ne’e mak fó sasin no loke mundu matan no tilun katak, ita hakarak hamrik mesak ukun rasik-aan, ne’ebé ha’u hanoin ita hot-hotu sei moris presiza halo reflesaun saida mak ha’u halo ona ba ha’u-nia rai, fila-fali ba ita an rasik. Tan ne’e mak kada tinan ita hanoin hikas ho reja, sunu lilin ho atividade oi-oin,” nia hateten.
Notísia relevante:Saúde Oekusi hala’o akampamentu triajen masál no konsulta espesialidade iha Oesilo
Entretantu, tema ba komemorasaun loron nasionál juventude no loron akontesimentu Masakre Santa-Krus 12 Novembru ba tinan ne’e mak, ‘Ha’u Timoroan Orgullu ho Ha’u Nia Nasau’
Jornalista: Abílio Elo Nini
Editór: Rafael Ximenes de A. Belo
