VIKEKE, 13 Novembru 2025 (TATOLI)—Komemora Repúblika Demokrátika Timor-Leste (RDTL) ba da-50 (28 Novembru 1975-28 Novembru 2025), autoridade Postu Administrativu Uatulari, Munisípiu Vikeke, realiza espo ba grupu agrikultór sira hodi fa’an produtu lokál.
Iha abertura espo ne’e, reprezentante Ministru Agrikultura Peska, Pekuária no Floresta (MAPPF), Bernardo Amaral hateten postu Uatulari rai buras no potensiál ba setór agrikultura nune’e produtu sira-ne’ebé agrikultura sira prodús nafatin fa’an hodi hetan osan hanesan liuhusi espo ida-ne’e.
“Liuhusi feira ida-ne’e atu itabele prepara di’ak liután hodi ba futuru ita hatudu ba maluk sira husi munisípiu seluk, postu seluk, katak ita Uatulari mós esforsu nafatin hodi halo kompetisaun ba produtu agríkola ne’ebé mak iha ita-nia rai,” Bernardo Amaral hateten iha ámbitu abertura espo iha Suku Makadike de Cima, Kinta ne’e.
Atuál asesór MAPPF ne’e hatutan iha espo ne’e presiza tau mós prodús hakmerik tanba hakmerik ne’e ai-han lokál ne’ebé mistura husi ai-farina tahan, kamii, etu no ai-manas.
“Produtu hakmerik ne’e sai hanesan eransa ida-ne’ebé ita-nia beiala sira husik hela ba ita. Ita tenke kontinua nafatin hodi promove,” nia subliña.
Iha fatin hanesan, Administradór Postu Uatulari, Jorgé Ribeiro haktuir, aleinde espo, sira mós organiza atividade hanesan desportu, futu manu no sa’e bua.
Serimónia espo ne’e, abertu husi atuál asesór MAPPF, Bernardo Amaral, Majór Jenerál FALINTIL-Forsa Defeza Timor-Leste (F-FDTL), Américo Ximenes ‘Sabika Besi Kulit’ no autoridade lokál.
Stand sira iha espo purvolta 3- resin hodi utiliza ba fa’an produtu lokál sira hanesan fehuk, foremungu, ai-farina, ai-farina kukus, foos mean, mutin no metan no fa’an mós tais.
Jornalista: Vitorino Lopes da Costa
Editór: Xisto Freitas da Piedade
