Dili, 17 Novembru 2025 (TATOLI)–Ministériu Komérsiu no Indústria (MKI) no empreza manán-na’in selebra kontratu ba implementasaun projetu konstrusaun merkadu foun iha Munisípiu Lautein no Ermera.
Serimónia ne’e prezide husi Ministru Komérsiu no Indústria, Nino Pereira, ho prezensa husi reprezentante empreza manán-na’in, Koordenadór Gabinete Parceria no Reforma (GCPeR) inklui ekipa téknika husi Diresaun Nasional Komérsiu Internu.
Biban ne’e, Ministru Nino Pereira hateten, projetu merkadu foun ne’e sei fó oportunidade ba vendedór lokál, aumenta seguransa no fó dignidade ba konsumidór sira.
“Ministériu Komérsiu no Indústria kontinua ho kompromisu atu sustenta dezenvolvimentu ekonomia lokál no nasionál, liuhusi infraestrutura komérsiu ne’ebé sustentável, inovadór no inkluzivu,” Governante ne’e hato’o hafoin selebrasaun kontratu, sala enkontru MKI, Mandarin.
Notísia relevante : MKI simu ona relatóriu finál dezeñu detalladu merkadu munisipál tolu
Projetu merkadu foun ne’e ho finalidade maka, dahuluk sei moderniza infraestrutura komérsiu lokál, fó dignidade ba vendedór no konsumidór sira, daruak aumenta asesibilidade no seguransa hodi garante kondisaun ambiente ne’ebé diak, no datoluk fó oportunidade ba dinamiza atividade ekonomia lokál, sustenta dezenvolvimentu komunidade no kontribui ba ekonomia nasionál.
Empreza manán-na’in sei implementa projetu tuir padraun téknika no seguransa internasionál, ho supervizaun regulár husi MKI.
Aleinde ne’e, konstrusaun sei hahú tuir kalendáriu ne’ebé mensiona iha kontratu hodi garante transparénsia no efisiénsia iha prosesu.
Inisiativa ne’e nu’udar kompromisu institusionál MKI nian, ne’ebé hakarak promove dezenvolvimentu infraestrutura komérsiu no sustentável, fó prioridade ba inovasaun no inkluzaun sosiál, no asegura impaktu pozitivu ba ekonomia nasionál no komunidade lokál sira.
TATOLI
