OEKUSI, 19 Novembru 2025 (TATOLI) – Ekipa konjunta husi Rejiaun Administrativa Espesiál Oekusi Ambeno (RAEOA), kuarta ne’e, muda obrigatóriu komersiante sira iha merkadu tradisionál Numbei hodi kontinua fa’an fali sira-nia sasán iha merkadu provizóriu ne’ebé prepara ona iha bairru Masin-Kliku suku Costa sub-rejiaun Pante Makasar.
Ekipa konjunta ne’e, komposta husi Diresaun Rejionál Komérsiu no Indústria, Diresaun Rejionál Infraestrutura (DRI) ho Departamentu Serbisu Água, Saneamentu (SAS), Eletrisidade de Timor-Leste (EDTL), Diresaun Rejionál Terra no Propriedade, akompaña husi komandu PNTL sub-rejiaun Pante Makasar no Autoridade Komunitáriu Costa.
“Ita muda sira loron rua ona, tanba eskavasaun aterru ba merkadu tuan ne’e komesa ona, entaun ita-nia negosiante sira obrigatoriamente tenke sai ona mai merkadu provizóriu, atu kontinua fa’an sira-nia sasán ho dignu,” Xefe Departamentu Komersíu Oekusi, Crisencio Susu ba jornalista sira iha Oekusi, ohin.
Notísia relevante:Uma-kain haat iha merkadu Numbei seidauk sai, Autoridade husu atu koopera
Nia esplika, hafoin muda, ekipa konjunta mós koloka kedas negosiante sira tuir kategoria fa’an, tanba tuir enkontru ne’ebé ekipa konjunta deside ona. Kolokasaun ne’e iha tipu neen ka hitu, hanesan sira-ne’ebé faan roupa ketak, buah-malus forma ida, fa’an modo fatin ketak, kioske, fa’an na’an no animál moris sira-nia fatin ketak, fa’an ai-fuan inklui fa’an ikan mós hanesan, la hamutuk hanesan uluk iha merkadu tuan.
Tuir ezekutivu ne’e, mekadu ne’e provizória de’it, hodi hein kontrusaun foun merkadu tuan, ne’ebé daudaun ne’e empreza hahú aterru ona.
Tanba ne’e, lista ne’ebé ekipa konjunta identifika iha atividade rua; negosiante permanente ne’ebé faan iha merkadu Numbei kada loron hamutuk na’in-221 no negosiante ambulante sira-ne’ebé mai fa’an iha loron merkadu de’it hamutuk na’in-300 resin.
“Bazea orientasaun husi ekipa konjunta, katak vendedór sira faan komesa husi dader to’o loraik, kalan idak-idak tenki fila uma, la autoriza atu faan no toba iha merkadu, tanba merkadu ne’e fatin faan la’ós fatin fa’an no toba, ne’ebé ekipa sei akompaña, semak fa’an hotu kontinua toba, ita sei opsaun ba nia, atu mantein fa’an ou la’e,” nia apela.
Notísia relevante:Merkadu Numbei sei konstrui ho verba rihun $76, aterru hahú daudaun ona
Catarina Caet, nu’udar negosiante modo husi aldeia Oésno suku Costa, orgullu tanba fatin ne’ebé ekipa konjunta prepara sufisiénte no dignu atu uza ba fatin fa’an sira-nia sasán.
“Ami sente kontente tanba muda ami mai iha kraik ne’e ho dignu maibé triste uitoan tanba barak mak la hetan fatin, entaun ami balun hadau malu de’it, ita haree forma ami ne’e kapas ona, ne’ebé ami-nia esperansa mak ne’e, sintina sira tenke di’ak, tanba merkadu akumula ema barak, entaun tenke tau bee, sela’e ema soe arbiru de’it fo’er. Agora ita observa ambiente moos uitoan, ami senti di’ak, maibé ami mak seidauk tama tan, ne’ebé ita hein katak, ekipa sei rezolve buat sira-ne’e,” nia orgullu.
Iha biban ne’e, Vendedór Orlando Colo, rekomenda ba ekipa konjunta atu kontinua tau matan ba funsionamentu ijiéne liu-liu toilet públiku sira.
“Ohin muda ona ami husi merkadu tuan mai iha ne’e, iha nia prosesu ha’u sente la’o kapa’as ona, tanba ami fa’an ne’e iha idak-idak nia fatin, buah-malus, modo no roupa, maibé ekipa forma ami ne’e ladun kompletu tanba dalan atu tama ba klaran ne’e ladun loos, ida-ne’e mak ami-nia preokupasaun, tanba ami iha klaran ne’ebá, ema sei latama kuandu dalan laiha, balun hela iha laran, balun iha estrada-ninin maibé dalan laiha atu tama ba laran, entaun ida-ne’e sei hamosu diskuti malu entra ami fa’an-na’in,” nia hateten.
Notísia relevante:Negosiante Numbei preokupa ho kondisaun merkadu provizóriu ne’ebé Autoridade RAEOA kria
Jornalista: Abílio Elo Nini
Editór: Rafael Ximenes de A. Belo
