OEKUSI, 18 Novembru 2025 (TATOLI) – Prezidente Autoridade Rejiaun Administrativa Espsiál Oekusi Ambeno (RAEOA), hala’o ona fiskalizasaun no avalia projetu investimentu haki’ak manu-rade 1000, ne’ebé konstrui husi Autoridade Sesante, iha bairru Tula-Ika suku Lifau sub-rejiaun Pante Makasar no rezulta katak iha irregularidade.
“Semana kotuk, ha’u rasik ba observa no fiskaliza direita investimentu ne’e, polítika ne’e di’ak, maibé nia problema iha dokumentu kooperasaun, iha irregularidade barak, ha’u konsulta ho jurídiku sira avalia ona, tanba kooperasaun ita tenke hetan nia rezultadu, la’ós fó fali keuntungan (lukru) ba parseiru, ne’ebé ha’u trava ona, sei hapara, atu haree didi’ak nia dokumentu sira kooperasaun ne’e, bele fó prejuízu ba ita-nia Estadu,” nia hateten iha Oekusi, ohin.
Notísia relevante:Autoridade RAEOA haki’ak manu-rade hodi fornese ba programa merenda eskolár
Antes ne’e iha loron 09 Abríl 2025, Prezidente Autoridade RAEOA Sesante, Rogério Tiago de Fátima Lobato, konsidera investimentu haki’ak manu-rade 1000 iha suku Lifau ba futuru bele fornese ba programa merenda eskolár iha estabelesimentu ensinu sira iha Oekusi.
“Programa haki’ak manu-rade ne’e, atu ita bele hetan manu-tolu barak hodi aproveita tau ba merenda eskolár, atu apoia eskola sira iha Oekusi, sira-neʼebé ita haree katak bele fó manu oan entaun ita sei iha mákina ida naran inkubadora atu lu’ut manu-tolu sira, liu loron 21 de’it, manu-rade oan sira moris ona. Se ita hakarak halo manu-rade barak mak manu-tolu mós sei barak. Nune’e eskola sira ita bele fornese,” Rogério Lobato dehan.
Entretantu, programa haki’ak manu-rade ne’e realiza tanba hetan apoia téknika husi nasaun Filipna liuhusi kooperasaun ho Sekretária Rejionál Agrikultura no daudaun ne’e sei jere husi sidadaun Filipina.
Notísia relevante:Autoridade RAEOA oferese manu-rade 100 ba grupu komunidade iha Pante Makasar
Tuir planu hafoin grupu haki’ak manu-rade ne’e husi Filipina jere to’o tinan ida, sei entrega ba Governu hodi jere rasik investimentu ne’e, aliende haki’ak manu-rade no mós sei haki’ak mós fahi iha fatin referidu.
Jornalista: Abílio Elo Nini
Editór: Rafael Ximenes de A. Belo
