OEKUSI, 18 Novembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, informa, iha tempu-badak Autoridade sei halo kompensasaun ba abitante 156 ne’ebé hetan despeju administrativu husi Sekretáriu Estadu Asuntu Toponímia no Organizasaun Urbana (SEATOU), maibé husu ba uma-kain haat ne’ebé seidauk koopera tenke hamamuk ona fatin.
“Maun alin sira-ne’ebé sei kontinua hela iha área merkadu ne’e, hela uma-kain haat seidauk sai, mezmu maioria koopera ona no sai ona, ha’u husu sira uma haat ne’e, tenke sai ona no koopera di’akliu, tanba arredór merkadu Numbei ne’e laiha rai privadu ida dezde uluk, ita Oekusi-oan tenke respeita malu, rona Governu nia planu atu hadi’a merkadu ne’e,” nia hateten ba jornalista sira iha Oekusi, ohin.
Notísia relevante:Abitante 156 iha merkadu Numbei koopera ho Governu sobu rasik uma-kioske
Autoridade másima RAEOA ne’e informa, planu rekompensasaun, sei hahú iha tempu-badak, kuandu uma-kain haat koopera, tanba ekipa konjunta komposta husi Diresaun Rejionál Komérsiu, Indústria, Diresaun Rejionál Agrikultura, Obra Públika, terra no propriedade hamutuk ho Autoridade lokál sira, antes ne’e rekolla ona dadus afetadu sira-nian.
“Kompensasaun ne’e sei akontese. Iha fulan kotuk ha’u koordena ona ho terra, propriedade, asina ona rekompensasaun ba maun-alin sira-ne’ebé hetan afetadu iha arredór merkadu Numbei, ne’ebé nia montante ha’u ladun akapta tanba ne’e serbisu tékniku mak hatene, maibé ha’u asina ona. Iha tempu-badak ita sei hahú selu ona, tanba dadus kompletu, tantu uma no plantasaun sira,” nia promete.
Notísia relevante:Merkadu Numbei sei konstrui ho verba rihun $76, aterru hahú daudaun ona
Jestór merkadu Numbei, Fernando de Sousa, dehan, nu’udar venededór kumpre ona tanba ne’e komersiante inklui okupante 156 hetan ona xamada atu hamamuk fatin hodi fó oportunidade ba Governu atu moderniza merkadu referidu.
“Antes ne’e mós ami rekomenda ona ba Governu liuliu Autoridade RAEOA no SEATOU, atu konsidera patrimóniu sira-neʼebé komunidade sira konstrui ona hanesan uma, ai-oan no seluktan atu fó indemnizasaun, maibé ita haree kompañia hahú aterru ona, ami mós lakohi interven serbisu Governu nian, maibé ita-nia esperansa katak, kompensasaun ne’e tenke iha, tanba ami balun hela dezde 2004, karik iha tempu-badak mak selu ona ganti-rugi (kompensasaun), ida-ne’e ita agradese, tanba Governu lahaluha povu nia nesesidade,” nia hateten.
Nu’udar negosiante, sidadaun Oekusi ne’e orgullu ho planu Governu atu halo dezenvolvimentu, tanba kondisaun merkadu tradisionál Numbei laiha kondisaun dignu ba negosiante atu fa’an sasán ho seguru.
“Ami apoia atu hadi’a fatin ne’e sai di’ak, tanba ita observa nia kondisaun ladun di’ak, balun fa’an no la fa’an mós hela hotu iha ne’e, entaun imajen ladun di’ak, tan ne’e mak ami hot-hotu konkorda hodi koopera,” nia orgullu
Notísia relevante:Negosiante Numbei preokupa ho kondisaun merkadu provizóriu ne’ebé Autoridade RAEOA kria
Entretantu, antes ne’e iha loron 24 Marsu 2025, ekipa konjunta liderada husi Sekretáriu Estadu Asuntu Toponímia no Organizasaun Urbana (SEATOU), fó ona xamada atensaun ba vendedór sira-neʼebé halo uma no hela permanente iha merkadu Numbei, katak hahú loron ne’e 24 Marsu to’o loron 24 Abríl 2025 tenke hamamuk ona fatin.
Tanba merkadu referidu, fatin atu fa’an no sosa, la’ós fatin atu halo fali uma permanente hodi hela ho família, haki’ak animál, tan ne’e presiza husik livre, atu ba oin Estadu harii no hadi’a fali merkadu ne’e didi’ak, atu ema hotu uza ho fa’an dignu no servi ba ema hotu atu livre fa’an no sosa sasán.
Jornalista: Abílio Elo Nini
Editór: Rafael Ximenes de A. Belo
