DILI, 11 Dezembru (TATOLI)—Xefe Departamentu Forensik iha Hospoitál Nasionál Guido Valadares, Nilton Tilman, informa hahú husi Janeiru to’o Novembru ne’e, Hospitál Nasionál Guido Valadares liuhusi Departamentu Forensik halo ona autopsia ba mate-isin hamutuk 60-resin ne’ebé maiória kazu suisídiu.
Notísia Relevante: Nilton Tilman preokupa kazu suisídiu akontese kada fulan
“Ami simu mate-isin 60-resin kazu iha legál forensik nian no halo prosedimentu legál maiória autopsia ezaminasaun esternál ne’e, ba kazu 50resin. Husi kazu ne’e maiória autopsia ka ko’a mate-isin hodi deskobre kauza mate ne’e, maibé ida-ne’e maiória kazu suisídiu,” Xefe Departamentu Forensik iha Hospoitál Nasionál Guido Valadares, Nilton Tilman, hateten ba Jornalista sira iha nia kna’ar fatin, Bidau, ohin.
Nia dehan, distribuisaun tuir fulan ida-idak dalaruma iha fulan ida iha kazu uitoan no dalaruma fulan balun kazu aumenta.
“Hanesan iha fulan-Janeiru ita iha kazu haat (4), Fevereiru iha kazu hitu (7), Marsu iha kazu hitu (7), Abríl lima (5), Maiu hitu (7), Juñu tolu (3), Jullu hitu (7), Agostu ida 91), Setembru lima (5), Outubru lim (5), no Novembru iha kazu lima (5). Husi kazu sira-ne’e maiória suisídiu mak barak,” nia informa.
Nia informa, haree kazu suisídiu ne’ebé mak maka’as tebes, tanba ne’e nia husu ba parte hotu atu buka tuir nia abut atu nia problema loloos ne’e mak saida.
“Balun ita hateten katak ita moris iha situasaun ida-ne’ebé mak ekonómikamente defisil no sosiálmente ita-nia sosiedade ne’e dalabarak iha Violénsia nia laran,” nia dehan.
Nia esplika, ema sira-ne’e hahú husi idade tinan 19 to’o 22, iha mós balun iha idade tinan 14 no mós 15 ho tipu suisídiu ne’ebé mai barak ne’e mak tara-an.
“Balun sona-an, balun ko’a lima no balun konsege salva maibé nafatin tama iha kazu suisídiu. Se ita ko’alia kona-ba tipu no maneira maiória mak tara-an ne’e. Husi númeru ne’e maiória mai husi Munisípiu Ermera no Munisípiu ne’e mak sensitivu ba kazu sira hanesan suisídiu ne’e. Maibé ne’e lá’os ita atu halo estigma ba ita-nia Munisípiu ne’e, lae, maibé ne’e tuir dadus ne’e no mós Munisípiu Likisá,” nia dehan.
Jornalista : Felicidade Ximenes
Editór : Cancio Ximenes
