DILI, 07 juñu 2023 (TATOLI) – Xefe Departamentu Forensik iha Hospitál Nasionál Guido Valadares (HNGV), Nilton Tilman, preokupa ho kazu suisídiu (Tara-aan) tanba kada fulan sempre akontese, hanesan iha janeiru to’o maiu.
‘’Fulan janeiru to’o maiu, kazu suisídiu ne’e hamutuk tolu, husi ne’e feto ida no mane rua, maioria idade joven”, Nilton Tilman informa iha nia kna’ar fatin HNGV, ohin.
Nia rekorda, dezde tinan kotuk kazu suisídiu ne’e sa’e makas tanba ho problema oioin maibé husi fulan lima ne’e, forensik rejista kazu suisídiu tolu.
“Kazu suisídiu ka oho an ne’e kuaze fulan-fulan iha hela de’it, hanesan tinan kotuk ne’e kazu suisídiu ne’e sa’e makas, kazu suisídiu ne’e ho problema oioin mosu iha sosiedade hanesan depresaun, ekonomia família, entaun ida ne’e mak kontribui ba kazu sira ne’e”, nia esplika.
Nia subliña, kazu suisídiu ne’e mós akontese liu ba ema ne’ebé mak ho idade produtivu liuliu idade 15 ba leten, entaun forensik halo autopsia no rezultadu hato’o ba Ministériu Públiku.
“Kazu suisídiu ida ne’e dala barak ami-nia parte ami autopsia hotu ami haruka kedas relatóriu ba iha Ministériu Públiku”, nia konklui.
Jornalista : Felicidade Ximenes
Editór : Zezito Silva
