DILI, 17 Dezembru 2025 (TATOLI)—Ekipa Órgaun Polísia espesilizada husi Komisaun Antí-Korrupsaun (CAC, sigla portugés), iha Kuarta ne’e, maizumenus tuku 06:00 to’o tuku 07:00 oras Timor-Leste, halo buska no apreensaun iha Vise-Prezidente Timor GAP ba asuntu Infraestruta ho inisiál AC iha rezidénsia iha Aldeia 30 Agosto, Suku Komoro, Postu Administrativu Dom Aleixo, Munisípiu Dili.
Hafoin ne’e, halo mós buska no apreensaun iha área Fomentu, ne’ebé husi fatin rua ne’e konsege rekolla dokumentu nesesáriu sira inklui komputadór, laptop, USB, telemóvel no karreta ida ho marka Countryman.
Komisáriu interinu CAC, Miguel Acácio Faria klarifika, asaun ne’e bazeia ba mandadu judisiáriu husi Tribunál Judisiál Primeira Instánsia Dili.
“Buska no apreensaun ohin mai husi CAC rasik. CAC mak halo promosaun autopartisipasaun iha Ministériu Públiku no Ministériu Públiku remete ba Tribunál, Tribunál hasai mandadu buska no apreensaun mai iha Komisaun Antí-Korrupsaun halo ezekusaun,” Miguel Acácio hateten ba Jornalista sira iha ninia knaar fatin, Praia dos Coqueiros, Kuarta ne’e.
Maski nune’e, Komisáriu interinu lakohi hakle’an kona-ba AC nia envolvimentu iha kazu ho tipu saida tanba ne’e liga ho segredu justisa.
“Kazu ne’e tanba prosesu ne’ebé mak iha indísiu ba krime ruma. Ha’u labele ko’alia uluk tanba prosesu investigsaun nia laran hela, hanesan baibain ne’e sei iha prosesu investigsaun nia-laran hela labele pronúnsia buat ruma relevante ho kazu ne’ebé agora remete ona ba buska no apreensaun,” nia akresenta.
Notísia relevante : KAK-PNTL halo buska no apreensaun ba empreza Lin Lijenaa
Hafoin ekipa halo buska no apreensaun iha AC nia rezidénsia, lori kedan mai iha edifísiu CAC hodi submete ba indentifikasaun.
Komisáriu dehan, ba prosesu ne’e CAC labele halo detensaun ba AC tanba mandadu ne’e la’ós detensaun maibé buska no apreensaun de’it.
“Tanba ne’e CAC halo tiha identifiksaun ba nia hodi haruka nia fila,” nia katak.
Sasán sira ne’ebé ekipa halo apreensaun ohin rai hela iha edifísiu CAC Faról, nu’udar objetu apreendidu, hafoin informa kedan ba Ministériu Públiku.
Komisáriu asina ona despaisu hodi haruka ba Ministériu Públiku hodi informa kona-ba asaun ne’ebé halo ona iha AC nia rezidénsia.
“Daudaun ha’u foin asina despaisu hodi haruka ba Ministériu Públiku, nune’e depende ba sira atu tetu no deside katak buska no apreensaun ne’e kontinua ka lae. Ita labele ko’alia tanba ne’e prosesu la’o hela, CAC nia serbisu hanesan baibain CAC nafatin aguadra segredu justisa,” nia tenik.
CAC halo buska no apreensaun ne’e normalmente iha loron 30 nia-laran bainhira simu mandadu judisiál husi Tribunál.
Jornalista : Natalino Costa
Editora : Julia Chatarina
