DILI, 18 Dezembru 2025 (TATOLI)—Ministériu Justisa (MJ) rejista ona kondenadu hamutuk na’in-26 iha prizaun tolu sofre moras mentál.
“Atu halo tratamentu ba ema nain-26 ne’e maka kada sesta diresaun koloka psikiatria hodi fó terapia ba sira,” Diretór Nasionál Servisu Prizionál no Reinsersaun Sosiál iha MJ, Delfio Soares, informa ba Ajénsia TATOLI iha ninia knaar fatin, Kinta ne’e.
Husi númeru ne’e, rekluzu na’in-23 husi Prizaun Bekora, Prizaun Glenu na’in-ida no Suai na’in-rua.
“Rekluzu ne’ebé moras no hela iha sira-nia rezidénsia hamutuk na’in-10, husi ne’e Prizaun Bekora iha rekluzu na’in-lima, Prizaun Glenu iha lima no Prizaun Suai laiha,” Diretór akresenta.
Daudaun iha juveníl 39 hanesan kondenadu, kompostu husi Prizaun Bekora iha 36, Glenu ida no Suai rua.
Iha mós rekluzu estrajeiru na’in-18, kompostu husi Prizaun Bekora iha 14, Prizaun Glenu iha haat no Prizaun Suai laiha.
Notísia relevante : OMS aprezenta relatóriu moras la hada’et-dezafiu ba moras mentál
Aleinde ne’e, Diresaun Nasionál Servisu Reinsersaun Sosiál mós rejista kondenadu na’in-60 ho idade avansadu.
“Sira ne’e maioria la’ós moras mentál, karik moras mós ha’u bele dehan moras tuir idade nian. Sira-nia pena ne’e maioria husi sira ho pena variavél no maioria husi sira la hetan pena boot,” nia katak.
Kondenadu ho idade avansadu komete kazu maioria mak violasaun sesuál no abuzu sesuál.
“Entaun, ita nafatin asegura sira, haree ho sira-nia idade karik koloka sira ba atividade kma’an,” nia tenik.
Diretór relata, totál rekluzu iha Prizaun Preventiva iha Prizaun Bekora iha ema na’in-66, Prizaun Glenu iha ema na’in-lima, Prizaun Suai iha ema na’in-13, ho totál ema iha na’in-84.
Enkuantu Kondenadu iha Prizaun Bekora iha ema na’in-354, Prizaun Glenu iha 93, Prizaun Suai iha 108, ho totál 555.
Husi dadus ne’e feto na’in-21, restante mane 618. Sira ne’ebé daudaun ne’e atu kumpre metade pena ne’e iha rekluzu na’in-189 pur volta 80%.
Nune’e, parte diresaun kontinua fó tratamentu saúde ne’ebé dignu ba rekluzu sira.
“Rekluzu mós kada semana bele han naan to’o dala-rua ka dala-tolu. Entaun ita haree ba buat sira ne’e sira mós halo ezersísiu maibé la taka dalan bainhira sira-nia fíziku sente moras, prosedimentu ne’ebé ami halo ba sira mak hanesan nafatin halo koordenasaun ho klínika sira ne’ebé besik iha prizaun atubele fó tratamentu ba sira,” nia dehan.
Jornalista : Natalino Costa
Editora : Julia Chatarina
