DILI, 19 Dezembru 2025 (TATOLI)–Reprezentante Embaixada Austrália iha Timor-Leste, Lisa Hamigan no Asosiasaun Defisiente Timor-Leste (ADTL), Sesta ne’e, lansa ona Broadcast Lin ba Mudansa Inkluzaun (LMI).
Diretór Ezekutivu ADTL, Cesário da Silva hateten objetivu husi instalasaun Broadcast ne’e atu fasilita atividade advokasia ne’ebé durante ne’e asosiasaun hala’o ona.
“Dezde Asosiasaun Defisiente Timor-Leste eziste, foka maka’as ba advokasia mudansa mentalidade, mudansa polítika, mudansa ambientál no ba ida-ne’e ita rekorre ba meiu oioin,” Diretór dehan ba jornalista sira, iha Kintál Boot, Dili,
Cesário esplika programa ne’e nu’udár instrumentu divulgasaun ida ba organizasaun sira hodi destaka sira-nia servisu, inklui atividade ema ho defisiénsia sira-nian relasiona ho defende direitu ema ho defisiénsia sira.
“Programa ne’e sai hanesan kanál informasaun no divulga informasaun liga ho kapasidade ema ho defisiénsia no organizasaun sira-ne’ebé atende sira,” nia informa.
Fundu instalasaun ba Broadcast ne’e hamutuk rihun $5 hodi finansia programa dezenvolvimentu umanu husi Governu Austrália nian.
Jornalista: Osória Marques
Editór: Xisto Freitas da Piedade
