DILI, 07 Janeiru 2026 (TATOLI) – Komisaun C ne’ebé Trata Asuntu Finansa Públika iha Parlamentu Nasionál, aprova ona planu atu bá halo, entre Jullu no Agostu tinan ne’e, estudu komparativu iha Xina hodi haree implementasaun ba Impostu sobre Valór Akrexentadu (IVA).
Prezidente Komisaun C, Cedelízia Faria dos Santos, esplika razaun bá Xina tanba ein termu ekonomia boot no Timor-Leste sei iha problema ho reseita ne’ebé sei ki’ik.
Tanba ne’e, Komisaun sei halo estudu komparativu ne’e, liuliu haree kona-ba reseita sira ne’ebé nasaun referida arrekada.
“Entaun, ami hakarak ba haree asuntu ne’e, hodi ba oin implementa didi’ak, inklui IVA no taxa sei implementa iha 2027”, nia hateten hafoin sorumutu Komisaun iha Parlamentu, ohin.
Lembra katak Komisaun C hakarak prioriza diskusaun ba Impostu sobre Valór Akrexentadu (IVA) iha tinan 2026. Nune’e lejislasaun ne’e presiza halo análize kle’an, haree situasaun iha rai-laran, tanba bainhira lei ne’e vigora mak sei aplika taxa oioin ba sidadaun sira.
Antes ne’e, Vise-Ministra Finansa, Felícia Claudinanda Cruz Carvalho, hateten ministériu fó prioridade atu aumenta kolesaun reseita doméstika iha Orsamentu Jerál Estadu (OJE) 2026. Esforsu atu hasa’e reseita mak dahuluk haree ba kapasidade institusionál, liuliu iha sistema, rekursu umanu no lei.
Governu kontinua prepara Autoridade Tributária no Aduaneira atu administra lei IVA iha tinan 2027 hanesan parte ida prinsipál ba mobilizasaun reseita doméstika ne’ebé espera atu kontribui 1,5% husi Produtu Internu Brutu (PIB).
Notisia relevante: https://tatoli.tl/2025/12/30/parlamentu-prioriza-diskusaun-ba-impostu-sobre-valor-akrexentadu-iha-tinan-oin/
Jornalista: Nelson de Sousa
Editora: Maria Auxiliadora
