OEKUSI, 19 Janeiru 2026 (TATOLI) – Primeiru-Ministru (PM), Kay Rala Xanana Gusmão, akompaña ekipa avaliasaun sira komposta husi Ministériu Planeamentu no Investimentu Estratéjiku (MPIE), Ministériu Administrasaun Estatál (MAE), no Ajénsia Dezenvolvimentu Nasionál (ADN), segunda ohin hala’o enkontru avaliasaun ba funsionáriu no tékniku sira iha Diresaun Rejionál Infraestrutura (DRI) Rejiaun Administrativa Espesiál Oekusi Ambeno (RAEOA).
Notísia relevante:Governu hahú avalia kondisaun mínima ba instituisaun Estadu sira iha Oekusi
Iha okaziaun ne’e, Xefe Governu husu bá tékniku sira atu kontrola másima progresu serbisu fíziku ba projetu konstrusaun sira iha Oekusi, hodi fokuliu ba kualidade, nune’e bele gasta osan povu ho di’ak.
“Ha’u husu mak kualidade, ida ne’e hanesan responsabilidade ba osan Estadu nian, osan povu nian tanba povu la mate, laterus, ita lahetan ukun aan osan ne’e iha hotu Jakarta, ne’ebé osan povu nian tenke gasta ho didi’ak. Maibé, Oekusi-oan tenke haka’as an, forma kompañia rasik”, PM Xanana hateten iha edifísiu DRI Oekusi, ohin.
Xefe Governu konta katak, kada tinan ezije tau osan hodi halo lalais projetu sira maibé halo lalais tiha no gasta hotu osan, fulan-haat de’it obra sira ne’ebé konstrui, komesa aat fila-fali ona, tanba laiha kualidade.
Tanba husu kualidade la’ós dehan halo neineik mak iha kualidade más la’e, kualidade entaun Ajénsia Dezenvolvimentu Nasionál (ADN) tenke halo monitorizasaun rotina.
“Iha rai-boot (Dili) fofoun iha 2007-2012 ninian, liu tiha tinan tolu, kada sábadu ha’u la’o ha’u haree buat sira ne’e la la’o. Ha’u hakilár kompañia sira la to’o fulan ida hotu tiha ona, entaun ha’u kontente, liu tiha fulan-haat ha’u liu fali iha fatin sira-ne’e estraga hotu. Tanba ida-ne’e mak kria tiha ADN hodi ba verifika. Ho ida-ne’e mós mak iha projetu boot iha nasionál nian, sira ba haree tuir hela de’it hodi kurije tenke hadi’a, buat ne’ebé presiza hadi’a, nune’e mak ita iha konfiansa ho kompañia sira”, nia dehan.
Notísia relevante:Xanana husu Oekusi-oan hanoin ho reflesaun kle’an simu Governu Lokál iha 2027
Iha biban ne’e mós, PM Xanana rekomenda tékniku sira, atu buka to’ok kompañia lokál sira hodi akompaña nafatin sira, hodi bele finaliza obra ida ho kualidade, “Se la’e ita la prepara aan bolu kompañia husi rai-li’ur no ita simu de’it persentajen ema mak hala’o serbisu hotu, ne’ebé tempu ona atu responsabiliza rasik ba projetu sira ne’e, iha ita-nia rai,” nia tenik.
Xefe Governu mós enkoraza Oekusi-oan atu hasai kursu iha enjinária Sívil hodi nune’e bele forma kompañia rasik, karik hetan fiar husi Governu bele ezekuta projetu sira ne’ebé iha, tanba Oekusi-oan mak kaer rasik projetu sira ne’e, sei halo ho kuidadu no kualidade.
Notísia relevante:PM Xanana iha ona Oekusi durante loron lima ho ajenda prinsipál lima
Entretantu, Departamentu ne’ebé tutela iha Diresaun Rejionál Infraestrutura (DRI), mak hanesan, Departamentu Rejionál Transporte Terrestre no Komunikasaun (DRTT), Serbisu Água Saneamentu (SAS), Eletrisidade Timor-Leste (EDTL), Portu Iwao Kitahara Mahata no Ekipa Jestaun Ekipamentu Ekipamentu Apoia Dezenvolvimentu, Institutu Públiku (IGEADI, I.P).
Jornalista: Abílio Elo Nini
Editór: Rafael Ximenes de A. Belo
