OEKUSI, 18 Janeiru 2026 (TATOLI) – Primeiru-Ministru (PM), Kay Rala Xanana Gusmão, domingu lorokraik ne’e hala’o vizita traballu dahuluk ba tinan-2026 iha Rejiaun Administrativa Espesiál Oekusi Ambeno (RAEOA) durante loron lima ho ajenda prinsipál lima hodi observa progresu serbisu administrasaun públika inklui vizita konstrusaun sira.
Xefe Governu hafoin estadia iha fronteira Sakato, simu direita hosi Prezidente Autoridade RAEOA Régio da Cruz Salu ho Koordenadór ZEEDOA Herculano de Sousa, no simu kedas matak-malirin husi lia-na’in suku Nípani nu’udar mahein odamatan parte lorosa’e ho dadolin kontinua kedas tara-Tais no bidu tradisionál.
Hafoin ramata seremónia referida, komisaun organizadora konvida kedas Xefe Governu ho ekipa delegasaun kontinua viajén ba iha Gabinete Prezidente Autoridade RAEOA hodi hala’o enkontru alarga ho ekipa ZEEDOA.
Notísia relevante:MAE sei dezloka ba Oekusi atu esplika kona-ba avaliasaun estrutura administrativa
Entretantu tuir ajenda ofisiál ne’ebé Ajénsia Tatoli,I.P asesu, durante loron lima, mak hanesan iha loron segunda-feira, 19 Janeiru, Primeiru-Ministru sei hala’o enkontru alargada membru Autoridade RAEOA no funsionáriu sira iha salaun konevensaun álfandega Palaban hahú husi dadersan to’o lorokraik, hodi ko’alia kona-ba progresu serbisu iha Oekusi.
Iha tersa-feira, 20 Janeiru, Primeiru-Ministru hamutuk ho Autoridade Nasionál Mineiru (ANM) hala’o enkontru ho xefe suku 20 inklui sosiedade sivíl sira, hodi hala’o aprezentasaun kona-ba prosesu dezenvolvimentu mineiru, no iha parte lorokraik sei hala’o vizita ba projetu sira iha suku no aldeia inklui hatuur fatuk dahuluk ba edifisíu mídia Ambeno News. .
Iha kuarta-feira, 21 Janeiru, Autoridade RAEOA sei aprezenta ba Primeiru-Ministru kona-ba programa “Movimentu Empreendoderizmu Oekusi” no aprezentasaun ba programa setór agrikultura no agro-turizmu iha Oekusi.
Kontinua iha parte lorokraik, Primeiru-Ministru sei hala’o vizita traballu ba projetu estrada iha suku Bobokase ba estrada Sikone no suku Kutete kontinua postu UPF fronteira Nun-Ana.
Iha loron kinta-feira, 22 Janeiru, Primeiru-Ministru enkontru ho Autoridade RAEOA no ZEEDOA kona-ba konkluzaun ba programa vizita traballu durante loron lima, hahú husi 18 to’o 22 Janéiru 2026. Hafoin ne’e Xefe Governu ho ekipa dezloka kedas ba Dili liuhosu transporte terrestre Fronteira Sakato.
Notísia relevante:PM Xanana promove rekonsiliasaun ho natál hamutuk entre Naktuka no Oépoli
Prezidente Autoriadade RAEOA Régio da Cruz Salu, informa, katak ajenda prinsipál ne’ebé Autoridade prepara, Xefe Governu aprova hodi no sei la’o tuir durante loron lima iha Oekusi.
“Ajenda prinsipál fixu, ekipa interministeriál sira maki ha ajenda ketak-ketak no la presiza Primeiru-Ministru tuir,” nia informa Ajjénsia Tatoli,I.P iha Oekusi, ohin.
Exekutivu ne’e, afirma, iha loron 21 Janeiru dadersan, Primeiru-Ministru sei partisipa mós misa enseramentu Mahein Edukasaun iha Eskola Santo António Oekusi, no meudia kontinua vizita projetu estrada Sikone iha iha suku Bobokase, lorokraik tuku 6:30 mak aprezenta Programa Movimentu Empreendedorizmu Oekusi.
Notísia relevante:FOTO ATUÁL: PM Xanana simu hosi lia-na’in Oekusi ho kultura iha fronteira Sakato
Tuir observasaun Jornalista Ajénsia Tatoli,I.P observa, iha vizita ofisiál ne’e, membru Governu na’in-tolu mak akompaña Primeiru-Ministru, hanesan Ministra Finansa (MF), Santina Cardoso, Ministru Administrasaun Estatál (MAE) Tomas do Rosário Cabral, Ministru Planeamentu Investimentu no Estratéjiku (MPIE) Gastão Sousa.
Jornalista: Abílio Elo Nini
Editór: Rafael Ximenes de A. Belo
