DILI, 15 Janeiru 2026 (TATOLI)–Primeiru-Ministru (PM), Kay Rala Xanana Gusmão, informa, domingu semana ne’e, hamutuk ho Ministru Administrasaun Estatál (MAE) Tomas Cabrál sei dezloka ba Oekusi atui esplika kona-ba avaliasaun administrativa ne’ebé durante ne’e Governu halo hela ba munisípiu hotu.
“Domingu agora ha’u ho Ministru Administrasaun Estatál sei ba Oekusi tanba Ministru Tomas halo ona avaliasaun iha fatin hotu, entaun iha Oekusi nia sei esplika kona-ba avaliasaun estrutura administrativa. Agora ita temi Oekusi ne’e hanesan Munisípiu labele temi beibeik RAEOA, ZEESM no seluk tan, maibé temi Munisípiu,” Xanana hateten ba jornalista sira hafoin ramata enkontru ho Xefe Estadu José Ramos-Horta iha Palásiu Prezidensiál Dili, kinta ne’e.
Nia dehan, labele temi bebeik RAEOA no ZEESM tanba durante tinan barak la halo mudansa ba Oekusi.
“Ida-ne’e mak ha’u fó hatene ona ba sira katak Oekusi oan imi mak tenke hanoin, imi mak tenke diskute, imi mak tenke koñese imi-nia rain, atu haree took iha área hotu-hotu hodi prepara planu ba tinan lima (5) ne’ebé sei hahú iha 2027. Ba oin fó ba imi Oekusi oan mak jere rasik,” Xanana dehan.
Jornalista : Hortencio Sanchez
Editór : Cancio Ximenes
