DILI, 29 Janeiru 2026 (TATOLI)—Ekipa Aitana Football Club (FC) maski serteja ona eliminadu husi kompetisaun Tasa Liga Federasaun Futeból Timor-Leste (FFTL) 2025 maibé sei la fó oportunidade ba Emanuel atu manán iha jogu ne’ebé sei realiza iha Estádiu Munisipál Dili, Sesta (30/01/2026).
“Ami garante sei manán mezmu iha jogu Liga Futeból Timor-Leste (LFTL) ami derrota ona ho Emanuel FC. Tan ne’e, iha jogu Sesta aban ne’e ami sei la fó ba Emanuel atu manán leet de’it ami,” Asistente Treinadór Aitana FC hateten iha Estádiu Munisipál Dili, Kinta (29/01/2026).
Notísia relevante: Emanuel FC mehi manán Aitana iha Tasa Liga FFTL 2025
Nia relata maski la utrapasa ba meiu finál maibé Aitana nu’udár ekipa futeból ne’ebé iha dignidade no nu’udár treinadór hakarak hatudu jogu ne’ebé kompetetivu liuliu oinsá atu manán fali Emanuel iha Tasa Liga FFTL.
Emanuel FC rekolla pontu ida hafoin iha jogu abertura impata ho AD SLB, enkuantu Aitana FC derrota ida no pontu 0 iha tabela klasifikasaun Grupu A.
Grupu A lidera husi AD SLB ho totál pontu haat hafoin manán Aitana no impata ho Emanuel FC, iha produtividade golu tolu.
Jornalista: Natalino Belo
Editór: Xisto Freitas da Piedade
