OEKUSI, 10 Fevereiru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA) liuhosi Diresaun Rejionál Agrikultura, tersa ne’e, apoia ai-moruk ho tipu MIPcinta ho tipu Kanon ba agrikultór na’in-150 hodi utiliza rega ba natar ektare 36 atu kombate pestisida iha natar Holosa suku Lalisuk sub-rejiaun Pante Makasar.
Notísia relevante:Natar ektare 23 iha Holosá Oé-Cusse ameasa falla kolleta
Xefe Departamentu Estensaun iha Diresaun Rejionál Agrikultura Oekusi, Amaro Efi, esplika, ai-moruk tipu rua ne’e bele hamate peste, haburas hare nia tahan nune’e bele aumenta produsaun.
“Objetivu atu rega peste ne’ebé mak ataka plantasaun hare iha natar Holosa ne’e, oinsá bele atinje produtividade hare nian, no oinsá bele hadi’a ekonomia natar na’in-sira mak, ita atende situasaun jerál hanesan ne’e tanba ita uza ai-moruk oin-rua MIPcinta 50 wp ne’e rahun no Kanon ne’e bee, entaun sistema kombinasaun ba ai-moruk rua ne’e kahur mak foin bele atende ba atakasaun peste ne’e, tanba kuandu ataka ona, hare nia tahan dalaruma sai kinur no namlaek, entaun ho ai-moruk ne’e bele haburas fila-fali to’o hare-isin,” nia hateten iha natar Holosa, ohin.
Notísia relevante:Agrikultura apoia fini Membramo saka 900 ho adubu fasilita natar-na’in-175 iha suku Cunha
Iha fatin hanesan, Lorêncio Hornai, nu’udar natar-na’in, konsidera sei rezolve natar sira iha área Holosa, tanba kada tinan falla kolleta hafoin hetan atakasaun husi peste.
“Agradese Governu tanba tinan ne’e, fó ai-moruk hodi rega ami-nia hare iha natár sira. tanba kada tinan ami-nia hare sira-ne’e peste estraga hotu ikusmai ami balun falla kolleta, maibé ho intervensaun ne’e ajuda ona ami, bele hasa’e produsaun. Tanba ne’e, ami espera atividade iha kontinuasaun ba futuru, labele para de’it iha tinan ne’e,” nia orgullu.
Iha fatin hanesan, natar-na’in Agustinho Boquifai, rekomenda Governu presiza apoia kada tinan, nune’e produsaun hare bele kontinua aumenta.
“Governu tenke apoia ami-nia natar sira, kuandu la apoia ami, ami sei la fiar tan Governu, maibé kuandu apoia hanesan ne’e, ami sente kontente tanba tinan-tinan laiha apoia ruma só tinan ne’e mak apoia ami kona-ba ai-moruk atu rega hare sira,” nia espera.
Notísia relevante:MAPF no Autoridade kolleta hare membramo ektare 160 iha Pante Makasar
Entretantu, antes ne’e mós Diresaun Rejionál Agrikultura, apoia fini hare Membramo saka 900 kompleta kedas ho adubu orgániku AMO hamutuk falun-315, hodi fasilita natar-na’in-175 iha natar Petun suku Cunha sub-rejiaun Pante Makasar.
Jornalista: Abílio Elo Nini
Editór: Rafael Ximenes de A. Belo
