DILI, 10 Fevereiru 2026 (TATOLI)—Diretór Servisu Saúde Munisípiu Ermera, António de Deus, hateten Servisu Saúde Ermera rejista asu tata ema iha Ermera ne’e hamutuk 35 maibé laiha identifikasaun ba moras raiva.
“Kona ba pasiente asu tata hahú husi 01 to’o 31 Janeiru tinan 2026 ne’e, Servisu Saúde Munisípiu Ermera rejistu pasiente kazu asu tata hamutuk 35. Husi númeru ne’e laiha ida mak indentifka ho sintoms raiva,” António de Deus hateten ba Agência Tatoli liuhusi telefónika, ohin.
Nia dehan, ba pasiente sira-ne’ebé mak asu tata katégoria ba númeru ida entaun fase de’it maibé tama ba iha katégoria tolu mak foin halo vasina.
” Ba sira-ne’ebé mak katégoria ba númeru ida-ne’e mai ita fase de’it. Karik númeru rua no tolu ne’e karik ita sente nia kanek ne’e boot uitoan ita tenke sona ka halo vasina,” nia hateten.
Maibé ba iha estoke ai-moruk VAR ho RIC iha Servisu Saúde Munisípiu Ermera daudaun ne’e sufisiente hela no ida-ne’e la iha problema.
“Ami sctok kona-ba VAR ho RIC ne’e iha sufisiente hela hodi atende pasiente asu tata sira, ne’ebé kona ba ai-moruk ne’e ami laiha problema,” nia informa.
Antes ne’e, Prezidente Institutu Nasionál Saúde Públika Timor-Leste, Nivio Sarmento, informa Ministériu Saude (MS) rejista ema mate ba raiva hamutuk 24 iha tinan 2024 to’o 2026 nia laran.
“Fulan Janeiru tinan 2024 to’o Janeiru 2026 rejista pasiente ne’ebé mak asu tata hamutuk rihun 6.100. Husi númeru ne’e na’in-24 ho sintoma raiva to’o ikus lakon vida ka mate,” Nivio Sarmento dehan.
Nia esplika, kazu rua foun ne’ebé mak rejistu iha fulan-Janeiru tinan 2026 ne’e mai husi Munisípiu Likisá no Ainaru.
Agora Programa sira-ne’e liu husi intervensaun no halo vasinasaun masa ba animál liuliu asu nian ne’e la’o nafatin, tanba ne’e progama husi progama sira-ne’e no intervensaun maka’as liu tenke mai husu Minisériu Agrikultura Peska, Pekuária no Floresta liuhusi Diresaun Nasionál Pekuária nian.
“Tanba ne’e sira mak servisu maka’as tebes, intervensaun liña primeiru mak mai duni husi Diresaun Nasionál Pekuária. Ita husi saúde, liuhusi Ministériu Saúde rasik, prepara ai-moruk liu husik INFPM. Bainhira kazu ne’e mai duni fó vasina, atu nune’e bele prevene tanba iha kazu balun asu tata tiha lakohi relata no lakohi hakbesik fasilidade saúde. Bainhira asu tata tiha, hanoin ne’e buat ida-ne’e hanesan baibain ida,” nia dehan.
Tanba ne’e, Ministériu Saúde nafatin alastra ba komunidade atu kontinua halo vasina ba asu sira-ne’ebe asu ne’ebé seidauk hetan vasina raiva.
Nune’e, Diretór Kompra Institutu Nasionál Farmásia Produtu Médiku, Sergio Belo, hateten estoke ai-moruk anti raiva sufisiente atu atende ba munisipiu sira-ne’ebé mak asu tata.
“ Atualmente ita nia estoke aimoruk anti rabies sufisiente hela atu atende ba kazu asu tata ema iha munisípiu sira,” Sergio Belo informa.
Jornalista : Felicidade Ximenes
Editór : Cancio Ximenes
