DILI, 11 Fevereiru 2026 (TATOLI) – Ministru Planeamentu no Investimentu Estratéjiku no Prezidente Konsellu Administrasaun Fundu Infraestrutura (KAFI), Gastão de Sousa, hateten instituisaun sira ne’ebé seidauk iha fatin própriu, liuliu sira ne’ebé tutela ba Ministériu Petróleu no Rekursu Minerál (MPRM) tenke prevee orsamentu liuhusi Fundu Infraestrutura atu konstrui edifísiu.
Gastão de Sousa admite katak instituisaun sira ne’ebé tutela ba MPRM, hanesan Autoridade Nasionál Petróleu (ANP), Timor Gás no Petróleu, Empreza Públika (Timor GAP, E.P), Institutu Jeosiénsia Timor-Leste (IGTL), Autoridade Nasionál Mineiru (ANM), no Murak Rai Timor, daudaun aluga fatin iha Timor Plaza no City 8, ne’ebé kada tinan hasai osan barak hodi selu fatin aluger.
“Tanba ne’e maka idak-idak tenke hatene karik orsamentu gastu maka’as ba aluga edifísiu, sira tau osan iha Fundu Infraestrutura para bele halo uma. Ita atu halo uma tenke iha terrenu, agora laiha atu halo uma oinsá?”, ministru tenika ba Tatoli, ohin.
Nia mós rekoñese katak iha instituisaun sira barak ne’ebé laiha edifísiu, maibé daudaun ne’e Governu liuhusi Fundu Infraestrutura aloka verba balun hodi konstrui edifísiu ba Provedoria Direitu Umanu no Justisa (PDHJ), IGTL, Institutu Nasionál Dezenvolvimentu Mão-de-Obra (INDMO, sigla portugés) no Sekretaria Estadu Kooperativa (SEKoop).
Edifísiu ba SEKoop no IGTL sei harii hamutuk iha Kaikoli, iha Ministériu Solidaridade Sosiál no Inkluzaun (MSSI) nia kotuk no edifísiu ba INDMO harii iha Tíbar ho totál osan hamutuk millaun $2 no PDHJ mak iha fatin ketak ida.
Orsamentu ba konstrusaun kada instituisaun sira ne’e balun foti husi Fundu Infraestrutura alokadu tinan ne’e hamutuk millaun $301-resin.
Iha sorin seluk, Prezidente IGTL, Job Brites hateten orsamentu ne’ebé sira prevee lihuhusi Fundu Infraestrutura atu halo sira-nia edifísiu no laboratóriu permanente hamutuk millaun $5.
Daudaun iha ona dezeñu detalladu ba edifísiu ne’ebé tinan ne’e hakat ba konkursu públiku no bele hahú konstrusaun iha tinan oin.
Tanba seidauk iha fatin própriu, IGTL ne’ebé tutela ba MPRM aloka iha kada tinan orsamentu rihun $300 hodi selu fatin aluger iha City 8, ne’ebé kada fulan selu rihun $25.
Aleinde ne’e, Timor GAP tenke hasai osan rihun $70 iha kada fulan hodi selu fatin aluger iha Timor Plaza.
Notísia relevante: IGTL prevee kada tinan rihun $300 hodi selu fatin aluger iha City 8
Jornalista: Arminda Fonseca
Editora: Maria Auxiliadora
