OEKUSI, 12 Fevereiru 2026 (TATOLI) – Diretór Diresaun Rejionál Administrasaun, José Tanesib Anunu, fó-sai katak, rekursu umanu iha Rejiaun Administrativa Espesiál Oekusi Ambeno (RAEOA) sei la sufisiente atu prienxe kritériu ba implementasaun podér lokál no desentralizasaun eleisaun munisipál iha 2027, tanba funsionáriu permanente númeru ki’ik kompara ho funsionáriu kazuál.
Notísia relevante:Membru PN fiskaliza dezempeñu serbisu no aktu administrativu RAEOA
Antigu Vise MAE ne’e, hato’o nia preokupasaun, bainhira hala’o audiénsia ho membru Parlamentu Nasionál (PN) komisaun A trata asuntu kona-ba konstituisaun no justisa, iha salaun Gabinete Prezidente Autoridade RAEOA iha Oekusi, kinta ne’e.
“Ezemplu ida estrutura ne’ebé mak RAEOA iha, seidauk prienxe estrutura tanba funsionáriu permanente la to’o. Ita funsionáriu barak maibé barakliu iha edukasaun no saúde, ba estatál na’in-40 de’it, estrutura balun iha postu administrativu balun seidauk prienxe, atu prienxe tenke funsionáriu permanente, balun serbisu tinan lima ona maibé seidauk sai permanente. Entaun, ne’e rekomendasaun ida ba deputadu sira atu hato’o ba Komisaun Funsaun Públika atu bele konsidera Oekusi nian preokupasaun ba rekursu umanu, karik seidauk rezolve, entaun sai dezafiu boot ba iha implementasaun podér lokál tinan oin,” nia hateten iha audénsia ofisiál ne’e.
Notísia relevante:Xanana husu Oekusi-oan hanoin ho reflesaun kle’an simu Governu Lokál iha 2027
Membru Autoridade ne’e esplika katak, ba preparasaun ba polítika poder lokál dezentralizasaun antes ona, to’o 2025 ne’e kuaze finaliza ona atu implementa eleisaaun ba suku foun sira iha tinan ne’e 2026 tanba nia orsamentu mós prevee ona iha Orsamentu Jerál Estadu (OJE) 2026 ne’e.
“Ne’e dezafiu ida, karik ita la halo eleisaun tinan ne’e, entaun nia orsamentu tenki devolve fali ba kofre Estadu, tanba programa ne’e to’o de’it 2025, atu implementa iha tinan ne’e kontinua ba postu administrativu foun, hodi prepara ba 2027 ba munisípiu no poder lokál. Maibé, rekursu umanu mak problema boot ba Oekusi, ne’e ha’u husu ba deputadu sira atu hato’o ba funsaun públiku hodi haree ami-nia problema ne’e,” nia afirma.
Iha biban ne’e, Diretór JeráL RAEOA, Domingos Punef, relata sai dadus kona-ba totál funsionáriu iha Oekusi hamutuk 2.840 komposta husi funsionáriu kazuál 1.466, permanente 1.290, asesór nasionál na’in-ualu no Asistente Tékniku ka termu-sertu hamutuk 76.
“Dadus mak ne’e, ami entrega ba deputadu sira liu-liu Komisaun A, permanente númeru ki’ik hela, maibé kazuál mak barakliu, ne’e tanba tinan barak ona, laiha ida atu sai permanente,” nia informa.
Notísia relevante:Tinan ne’e, PM tau atensaun másima ba preparasaun eleisaun Governu Lokál iha 2027
Hatan ba rekomendasaun sira-ne’e, Prezidente Komisaun A, Deputadu Natalino dos Santos, konsidera presiza rezolve, tanba ne’e liuhusi Komisaun A sei koordena ho Komisaun Funsaun Públiku no Governu presiza tau atensaun.
“Preokupasaun rekursu umanu, iha Oekusi funsionáriu 2000-resin, funsionáriu permanente limitadu tebes, atu prienxe vaga ba kargu xefia sira inklui postu administrativu sira, ida-ne’e mak sai problema iha Oekusi ba futuru podér lokál no dezentralizasaun. Agora oinsá, sira husu ba Governu Sentrál atu tau atensaun liu-liu iha implementasaun poder lokál ne’ebé sei hahú iha 2027, ne’ebé husi RAEOA ohin dehan, sira kumpre saida de’it desizaun Governu no Estadu atu hatuun mai, ida-ne’e ita koordena ho parte funsaun públiku atu haree,” nia promete.
Notísia relevante:PA RAEOA indika antigu Vise-MAE lidera grupu tékniku ba podér lokál no desentralizasaun
Jornalista: Abílio Elo Nini
Editór: Rafael Ximenes de A. Belo
