DILI, 13 Fevereiru 2026 (TATOLI)-Jerente (CEO) The WestStar Group Malaysia, Tan Sri Dato’ Seri Syed Azman, ne’ebé akomañadu husi Ministru Petróleu Rekursu Minerál, Francisco da Costa Monteiro, hala’o enkontru ho Primeiru-Ministru, Kay Rala Xanana Gusmão, hodi atualiza progresu kooperasaun servisu durante ne’e iha Bayu Undang.
“Ohin loron jerente WestStar Group Malaysia mai enkontru ho Primeiru-Ministru, Kay Rala Xanana Gusmão, husu ha’u atu akompaña tanba durante ne’e servisu hamutuk ho Timor Gap halo joing venture hodi opera helikoptru rua ne’ebé opera husi Santos no fornese hela servisu transportasaun aero hanesan tula sasán no ema husi Dili ba plataforma Bayu Undang nian durante ne’e,” Ministru Petróleu Rekursu Minerál, Francisco da Costa Monteiro, informa ba jornalista sira iha Palásiu Governu, ohin.
Ministru afirma, servisu hamutuk durante ne’e la’o tiha ona tinan ida (1) no susesu tebe-tebes tanba konsege transporta (fly hours) to’o oras 100.000, no kona-ba seguransa nian (safety) nune’e ohin loron mai iha ne’e atu bele hamutuk selebra nia ekipa operasionál sira iha ne’e.
“Ba oin, sira sei hamutuk ho Timor Gap atu kontinua halo diskusaun hodi bele fortifika sira-nia programa joing venture ne’e no antesipa daudaun ona tanba iha futuru bainhira greater sunrise to’o ona mai oinsá mak parseria rua ne’e bele servisu hamutuk no fornese mós ba bayu undang faze daruak nian,” governante ne’e relata.
Nia hatutan, servisu sira ne’e la’o daudaun hela mak mai hakarak kumprimenta Xefe Governu hodi atualiza hela progresu servisu ne’ebé durante ne’e la’o ho di’ak tebes.
“Laiha desizaun atu taka bayu undang tanba iha servisu lubuk ida mak operadór bayu undang nian halo servisu maka’as no intensivu hela ho Autoridads Nasionál Petróleu hodi haree kona-ba kalenderizasaun, no etapa nesesáriu atu halo dezmantelamentu ba ekipamentu no parte komponente ne’ebé mak sei la presiza iha prosesu kontinuasaun iha futuru mai,” nia dehan.
Iha tinan ida-ne’e ka tinan rua mai, parte ne’ebé la presiza ba produsaun iha futuru bele dezmantela daudaun ona no balun lori mai iha portu Tibar, enkuantu hirak ne’ebé presiza halo rahun depois mak haree halo destruisaun maibé ekipamentu ne’ebé bele uza sei tau iha sentru treinamentu teknolojia para ema bele haree.
“Maibé plataforma mina no gás ita hanoin hela para mantein, atu aban bainrua ho diskusaun operadór sira bele kontinua produsaun ba tinan sanulu ka rua-nulu oin mai,” nia hateten.
Iha biban ne’e, Jerente The WestStar Group Malaysia, Tan Sri Dato’ Seri Syed Azman, hateten ohin loron sira mai hasoru Primeiru-Ministru, Kay Rala Xanana Gusmão, hodi diskute kona-ba programa joing venture ne’ebé sira hala’o durante ne’e ho Timor Gap, nune’ebé servisu hamutuk ne’e la’o ho di’ak tebes, susesu no oferese helikoptru rua hodi halo operasaun áero husi Dili ba Bayu Undang.
“Helikopter ne’ebé iha envolve operadór tékniku timoroan na’in-neen (6) ne’ebé servisu hamutuk ho ami hodi suporta operasaun helikoptru durante ne’e ho sira-nia abilidade hodi kuidadu no tula ema no sasán sira,” nia dehan.
Jornalista : Alexandra da Costa
Editór : Cancio Ximenes
