KOVALIMA, 19 Fevereiru 2026 (TATOLI)- Prezidente Autoridade Munisípiu Kovalima, Miguel Armada Cardoso, akompaña husi Sekretáriu Administrasaun Finans, distribui nesesidade bázika ba família vulnerável sira iha Aldeia Lokeu,Suku Debos,postu Administrativu Suai,Munisípiu Kovalima.
Autoridade Kovalima distribui nesesidade bázika mak hanesan foos marka globus saka 18, mina litru tolu unidade 18, mosketeiru 18 no ai-moruk susuk nian unidade 18.
“Autoridade Kovalima distribui nesesidade bázika hanesan mosketeriu no ai-moruk susuk nian, relasiona Servisu Saúde Munisípiu Kovalima rejista kazu moras dengue hamutuk 30-resin,” PAM hato’o deklarasaun ne’e iha Aldeia Lokeu,Suku Debos ,Postu Suai ,Munisípiu Kovalima.
PAM Kovalima husu ba Komunidade sira toba tenke uza mosketeriu, nune’e bele redús kazu moras dengue iha munisípiu Kovalima no distribui foos no mina tein sira ne’e atu hakmaan komunidade sira nia difikuldade.
Autoridade Kovalima distribui nesesidade bázika ba família vulnerável ne’e bazeia ba simu lista husi Xefe Aldeia. Família Vulnerável sira ne’ebé hetan apoiu nesesidade bázika tanba haree ba sira-nia kondisaun vulnerável tebes duni.
Notísia relevante: PR Horta apoia nesesidade bázika ho osan ba vítima inséndiu iha Lela-Ufe
Jornalista: Celestina Teles
Editór:Florencio Miranda Ximenes
