DILI, 19 Fevereiru 2026 (TATOLI)—Ekipa Emanuel Football Club (FC) planeia sei halo atake iha inísiu hodi gaña golu bainhira kontra Portu Taibessi FC iha jogu volta daruak meiu finál Taxa Liga Federasaun Futeból Timor-Leste (FFTL) 2025.
Asistente Treinadór Emanuel FC, Van Basten esplika hafoin jogu volta dahuluk ramata ho skor 1-1, Emanuel kontinua kedas halo evaluasaun liuhusi treinu liuliu estuda forsa no frakeza husi ekipa adversária ho objetivu hakarak gaña pontu hodi hakat bá finál.
“Semana kotuk ami difísil hetan golu nune’e ami sei hatún avansadu na’in-haat, tanba ne’e ami treinu foku ba atake,” Van Basten hateten iha Estádiu Munisipál Dili, Kinta ne’e.
Notísia relevante: Emanuel impata ho Portu Taibessi iha volta dahuluk meiu finál Tasa Liga FFTL
Van Basten relata, atu atinje objetivu referidu, Emanuel halo mudansa estratéjia finalizasaun tanba konsidera jogu volta dahuluk jogadór avansadu sira seidauk ezekuta másima oportunidade iha grandeia Portu Taibessi.
Aleinde ne’e, prosesu tranzisaun ne’ebé konsideradu tarde nune’e loke oportunidade ba ekipa adversária halo defensiva ho disiplina iha-ne’ebé aplika tátika low block.
“Ami identifika ona jogadór inportante husi Portu Taibessi nian hodi antesipa atake husi Portu Taibessi ne’ebé konsideradu perigozu,” Van Basten argumenta.
Iha fatin hanesan, Kapitál Ekipa, Nilton Carvalho hateten sei aplika tátika ne’ebé durante semana-ida halo preparasaun no rona orientasaun husi treinadór nune’e bele hetan rezultadu ne’ebé pozitivu bainhira kontra Portu Taibessi.
“Garante tanba ami mai ho jogadór ne’ebé kualidade,” Nilton Carvalho kompromete.
Entertantu, jogu entre Emanuel FC kontra Portu Taibessi sei realiza iha Estádiu Munisipál Dili, Sábadu (21/02/2026), hodi determina destinu ekipa rua ba finál hafoin iha volta dahuluk ramata ho rezultadu impata 1-1.
Jornalista: Natalino Belo
Editór: Xisto Freitas da Piedade
