OEKUSI, 19 Fevereiru 2026 (TATOLI) – Autoridade Protesaun Sívil (APC) Rejiaun Administrativa Espesiál Oekusi Ambeno (RAEOA), kinta ne’e, observa progresu konstrusaun ba vítima inséndiu uma-kain neen iha suku Lifau sub-rejiaun Pante Makasar konklui ona.
Notísia relevante:Janeiru 2026, APC Oekusi rejista dezastre naturál 12 maioria anin sobu uma
Komandante APC Oekusi, João Sila, informa, vítima hirak-ne’e, hetan apoia materiál rekuperasaun husi Governu liuhusi Sekretáriu Estadu Protesaun Sívil (SEPS) tanba enfrenta dezastre naturál inséndiu ne’ebé konsidera aat totál.
Tanba ne’e, nu’udar Autoridade Protesaun, iha obrigasaun atu kontinua akompañia no monitoriza vítima sira, hodi konstrui hikas sira-nia rezidénsia ho materiál konstrusaun ne’ebé Governu oferese ona.
“Ami mai observa direita uma sira, tanba hetan rekuperasaun husi Governu, tanba enfrenta dezastre inséndiu ahi-han uma, ne’ebé kategória tama aat totál iha 2024. Tan ne’e, iha 2025 hetan ona materiál rekuperasaun, entaun ida-ne’e responsavel APC atu bele akompaña hodi utiliza sasán sira-ne’e halo uma, ita observa atuál, família sira halo ona uma, ne’ebé progresu balun atinje ona 90% no balnu konklui ona,” nia hateten ba jornalista sira iha suku Lifau, ohin.
Autoridade Protesaun Sívil ne’e, orgullu tanba Governu apoia materiál konstrusaun ba uma medida 7×6 maibé, vítima sira balu ho inisiátiva rasik haluan tan uma nia medida no kontribui hadi’a liutan, nu’udar ezemplu di’ak ba vítima sira seluk.
Notísia relevante:APC – Asosiasaun Maneo enkontru koordenasaun atu prepara prevene risku dezastre iha Oekusi
Xefe Suku Lifau, Delfino Sole, promete katak, sei kontinua akompaña vítima sira-ne’ebé hetan rekuperasaun atu kontinua harii uma dignu hafoin hetan apoia husi Governu.
“Nu’udar xefe suku, sei kontinua akompaña família vítima ne’ebé hetan rekuperasaun husi Governu. Ha’u rasik haree direita sira-nia uma, ne’ebé uma-kain neen ne’ebé hetan apoia iha tinan kotuk, sira halo ona uma, tanba sira hetan inséndiu, entaun tenke halo fali uma ida dignu, tanba Governu apoia ona sasán,” nia hateten.
Notísia reelvante:Autoridade RAEOA atribui eskritóriu ida ba APC Oekusi atu hala’o serbisu
João Eko nu’udar vítima inséndiu, agradese tanba Governu apoia materiál konstrusaun, nune’e bele harii hikas nia uma ho dignu.
“Ha’u agradese ba Governu liuhusi APC, tanba bele ajuda ha’u hodi halo fali ha’u-nia uma ne’e, maske materiál la sufisiente maibé nu’udar na’in ba uma ne’e, ha’u esforsa aumenta tan materiál hodi halo boot uitoan, no la’ós apoia de’it materiál maibé apoia mós ai-han balun ho osan, hanesan foos, hena, sasán dapur nian no seluktan,” nia hato’o.
Jornalista: Abílio Elo Nini
Editór: Rafael Ximenes de A. Belo
