OEKUSI, 06 Fevereiru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA) sesta ohin, selebra akordu hodi renova kontratu ho Institutu Nasionál Farmasia no Produtu Médiku (INFPM) ho kustu rihun $600,075.00 hodi fornese ai-motuk no medikadimentu inklui kapasitasaun umanu ba iha Ospitál Referál Oekusi (HRO) durante tinan ida.
Notísia relevante:Ospitál Referál Oekusi rejista bebé na’in-neen lakon vida durante trimestre dahuluk
Diretora Diresaun Rejionál Saúde Oekusi, Merita Marques Lafo, esplika katak, renovasaun kontratu ne’e importante atu asegura fornesimentu ai-moruk, produtu medikamentu inklui kapasitasaun rekursu umanu ba servisu saúde Oekusi.
“Ita-nia item ai-moruk Oekusi iha 300-resin husi tipu tolu, tipu esensiál, vitál no nesesáriu. Aleinde item ai-moruk iha mós produtu médiku seluk hanesan konsumaveis hanesan seringa no reajente ba item laboratóiu inklui osijéniu, ne’ebé kontratu ne’e, la’ós ba fornesimentu produtu médiku de’it, maibé involve mós prosesu hahú kompra liuhusi aprovizionamentu to’o distrisaun iha fatin sira, no integra mós kapasitasaun ba rekursu umanu liu-liu ba jestaun armazeinamentu,” nia hateten ba jornalista sira hafoin selebra akordu kontratu iha Oekusi, ohin.
Tanba ne’e dirijente saúde Oekusi ne’e, rekomenda ba ekipa INFPM atu kumpre dokumentu kontratu hodi garantia fornesimentu ai-moruk iha Ospitál Referál Oekusi.
“Buat barak sita ona iha akordu laran, entaun ita husu mak INFPM bele asegura fornesimentu ne’e la’o tuir akordu ne’ebé mak iha, entaun durante ne’e ita la’o tuir akordu no laiha problema ba abastesimentu ai-moruk nian, dalaruma ita iha problema ba stoke-out tanba kompra ne’e iha rai-liu’r, tanba ne’e mak stoke-out liu-liu vitál sira, tanba ita kompra ai-moruk bazeia kazu ne’ebé iha, sei ita kompra barak maibé kazu laiha, entaun estraga de’it ai-moruk,” nia rekomenda.
Notísia relevante:Prezidente Autoridade RAEOA deteta problema lima iha Hospital Referénsia Oé-Cusse
Iha biban ne’e, Diretora Ezekutiva INFPM, Paulina Mendonça Maia, promete katak, INFPM asegura fornesimentu hodi garantia tratamentu saúde ba povu Oekusi nia vida.
“Renovasaun akordu ne’e, atu apoia fornesimentu médiku mai Oekusi, ho nia valór rihun $600,075.00 no mós emerjénsia nian rihun $10, atu fornese medikamentu, osijéniu, reajente no konsumavés, ne’ebé parte INFPM nafatin apoi Ospitál Referál Oekusi liu-liu armazenamentu adekuada hodi asegura kualidade ai-moruk sira iha Oekusi,” nia hateten.
Notísia relevante:Ai-moruk ARV iha Oekusi sufisiente atu trata pasiente HIV-SIDA
Entretantu, totál pesoál saúde iha Oekusi hamutuk na’in-427, destaka ba serbisu saúde rejionál, Ospitál Referál Oekusi, sentru saúde lima no postu saúde 21 no fatin tratamentu suku iha fatin izoladu 12, inklui pontu entrada fronteira Sakato no aeroportu Rota do Sândallo.
Jornalista: Abílio Elo Nini
Editór: Rafael Ximenes de A. Belo
