DILI, 25 Fevreiru 2026 (TATOLI ) – Tribunál Rekursu halo promosaun ba juíz sira hahú husi terseira klase promove ba segunda klase no segunda klase halo promosaun ba primeira klase konklui iha Abríl tinan ne’e tanba promosaun ne’e objetivu atu harii Supremu Tribunál ba Justisa.
Prezidente Tribunál Rekursu Afonso Carmona, fó-sai katak, daudaun ne’e inspetor Tribunál Rekursu halo hela inspesaun hodi avalia dezempeñu serbisu kada juiz.
Prezidente Tribunál Rekursu sei relata ba Prezidente Repúblika iha iha fulan-maiu hafoin konklui avaliasaun dezempeñu, molok harii Supremu Tribunál Justisa.
“Abríl konklui ona no ita hahú halo promosaun ba juis husi terseira klase promove ba segunda klase, segunda klase promove ba primeira klase no juis sira ne’ebé foun agora halo hele estájiu,” Carmona ko’alia iha Tribunál Judisiál Primeira Instánsia, Dili, Kaikoli, kuarta ne’e.
Nia dehan, juis estájiariu na’in -12 tuir estájiu tinan rua ho balun de’it, maibé prolonga ba tinan haat, tanba ne’e Konsellu Superiór Majistratura Judisiária tenke haree situasaun ne’e oinsa habadak prosesu.
Prezidente Carmona fó-sa katak, edifisiu Tribunál tuan ne’ebé lokaliza iha Kolmera halo hela reabilitasaun no edifísiu ne’e utiliza hanesan edifísiu provizoriu Supremu Tribunál Justisa hodi nune’e STJ halo ona nia funsaun.
“Ita mós prepara funsionáriu tékniku ne’ebé atu koloka ba fatin sira-ne’e ba sira ne’ebé tenke hatene sebisu iha fatin ne’e,” nia katak.
Jornalista: Natalino Costa
Editór: Evaristo Soares Martins
