DILI, 03 Marsu 2026 (TATOLI)-Iha komorasaun Loron Nasionál Veteranu ba Dasiak ho tema “Unidade Diversidade ho Nia Sentidu Patriotizmu” kombatente sira tau hanoin hamutuk katak luta hotu ona no agora tempu atu haree ba dezenvolvimentu nasaun nian.
Manuel Soares “Funu Lakan” nu’udar veteranu hateten komemorasaun loron ida-ne’e atu hanoin ba kotuk ho sentimentu ne’ebé triste tanba haree ba luta ba nasaun ne’e ninia, maibé ho tristeza ne’e ninia rezultadu mak ohin loron nasaun livre.
“Ami-nia [luta] hotu ona. Agora luta ba dezenvolvimentu nasaun nian iha joven sira-nia liman, tanba agora ita liberdade ona, bele halo buat hotu. Maibé, joven sira la aproveita didi’ak liberdade ida-ne’e maka futuru ita-nia ne’e sei monu”, Funu Lakan hateten iha ámbitu komemorasaun data ne’e, ohin.
Nia dehan husi luta ne’ebé sira halo, Estadu fó ona rekoñesimentu Estadu liuhusi medalla no fó subsídiu. “Uitoan ka barak, ida-ne’e sufisiente ona, tanba maluk barak ne’ebé mate iha ai-laran la hetan buat ruma. Ami sira sei moris ne’e hetan ona uitoan ka barak mak ida-ne’e ona”, nia katak.
Tuir nia, nasaun ne’e ukun-an ona, nune’e Estadu labele haree de’it mak veteranu sira, maibé haree mós problema seluk nasaun nian tanba rai ida-ne’e sei iha susar barak ne’ebé presiza atu resolve.
Iha sorin seluk, veteranu Nélio Mauquinta “Lagarto”, hateten hanoin situasaun iha 03 Marsu 1981, momentu ne’ebá moruk tebes tanba ida de’it mak hanoin mate ka moris rai ne’e tenke ukun an.
“Ami han tua dikin, koto-tahan, aidila lori nuu been da’an hodi han. Hanoin fali istória ne’e sente triste tebes, maibé agora ukun an ona mai ita hamutuk lori dezenvolvimentu ba oin, sai veteranu labele impede fali dezenvolvimentu ne’ebé la’o”, nian apela.
Aleinde ne’e veteranu Tito da Conceição Hornai “Todaho”, subliña komemorasaun loron veteranu ba dasiak ne’e, ksolok ba veteranu sira ne’ebé sei moris tanba ultrapasa situasaun difísil sira, maibé hanoin ba kotuk triste tanba maluk barak mak mate namkari isin no ruin buka la hetan.
“Subsídiu ne’ebé ita iha ne’e mai husi ita-nia rikusoin ne’ebé ita luta, ita-nia sakrifísiu ne’ebé mak ita hetan. Maibé, daudaun ita-nia maluk barak mak seidauk hetan sira-nia direitu maski sira-nia sakrifísiu ne’e liu tiha ona, maibé rekoñesimentu ne’e seidauk”, dehan.
Nia husu ba Governu atu aselera prosesu dadus reklamante ba veteranu sira nune’e sira mós bele hetan. “Ami-nia kontribuisaun ba nasaun ne’e hafoin ukun an mak nafatin kontribui ba estabilidade nasionál no dezenvolvimentu nasionál tanba uluk ita-nia mehi ne’e luta ba libertasaun nasionál”, salienta.
Kona-ba subsídiu ne’ebé veteranu sira hetan kada fulan ko’a $30, tuir nia, ida-ne’e di’ak tanba orsamentu ne’ebé ko’a ne’e atu dezenvolve futuru veteranu nian.
Veterana Juleta da Silva Jesus “Veteloi”, husu ba Governu atu prosesa lalais lista reklamante veteran sira, nune’e maluk sira ne’ebé seidauk simu bele hetan sira-nia direitu.
João dos Santos “Niki”, nu’udar veteran subliña katak komemorasaun loron ne’e, ba nia pesoál kontente maibé triste bainhira haree ba kotuk ema rihun ba rihun ne’ebé mate ba rai ida-ne’e.
“Ita reza nafatin ba sira nune’e sira-nia klamar nafatin apoia ita, liuliu ita-nia ukun-na’in sira atu lori nasaun ne’e la’o ba oin ho di’ak. Mensajen ba foinsa’e sira mak nasaun ne’e iha imi-nia liman, prepara an ba kaer rasik kuda talin, tanba nasaun ne’e iha rikusoin barak presiza atu dezenvolve”, konklui.
Jornalista: Arminda Fonseca
Editora: Maria Auxiliadora
