DILI, 10 Marsu 2026 (TATOLI)—Team líder Konsultante Bennatin Surya Cipta Joint ho Empreza Rachio Plan Konsultanta, Joko Rotisno, hateten konstrusaun edifísiu pediatria andar lima iha Hospital Nasionál Guido Valadares IHNGV) atinje ona 78% no sei entrega ba Governu iha fulan-Juñu.
“Konstrusaun ne’e loloos finaliza iha fulan-Dezembru 2025, maibé ita estende tan tempu ba iha Juñu 2026,” Joko Rotisno hateten ba jornalista sira iha konstrusaun edifísiu pediatria andar lima iha HNGV, Bidau, ohin.
Nia dehan, kona-ba estrutura hotu ona mak hanesan estrutura arsitektura, medikl elektrikál ho bio medikál, agora tama fali ba medikál elektrikál ho arsitektura, agora estende tempu tanba biomedikál seidauk ramata.
“Arsitektura iha li’ur ne’e hotu hanesan ita-boot sira haree iha laran ita sei hahú taka azjuleizu hahú husi andar lima no andar haat hotu ona no ita kontínua taka ajuleizu ba andar tolu no rua,” nia esplika.
Tanba ne’e, nia fiar katak fulan-Junu konstrusaun edifísiu pediatria andar lima ne’e ramata no entrega ba Governu.
Antes ne’e, Diretora Nasionál Ekipamentu Médiku iha Ministériu Saúde, Luduvina C. E. da Costa, hateten orsamentu ne’ebé atu sosa ekipamentu médiku atu prienxe ba edifisiu pediatria andar lima iha Hospitál Nasionál Guido Valadares (HNGV) hamutuk millaun $3.
“Husi parte Diresaun Nasionál Ekipamentu Médiku iha Ministériu Saúde prepara ona orsamentu hamutuk millaun $3 atu sosa ekipamentu médiku inklui instalasaun no fó formasaun ba pesoál saúde sira atu prienxe ba edifísiu pediatria andar lima ne’ebé mak daudaun ne’e konstrusaun hela iha Hospitál Nasionál Guido Valadares,” Luduvina C. E. da Costa hateten iha nia kna’ar fatin iha Lahane, ohin.
Nia esplika, ekipamentu ba ediísiu pediatria andar lima ninia espesifikasaun prepara husi consultant bazeia ba espesifikasaun ne’ebé sira prepara, entaun hanesan Diresaun Nasionál Ekipamentu Médiku aprezenta ona ba Ministériu Saúde.
“Ami-nia Diresaun ne’e haree liu ba espesifikasaun no kuantifikasaun ne’ebé konsultan prepara ona ne’e,” nia dehan.
Nia hateten, prosesu akizisaun daudaun ne’e la’o ona iha Komisaun Nasionál Aprovizionamentu (CNA).
“Komisaun Nasionál Aprovizionamentu (CNA) aprova ona, entaun sira mak hatene tanba tuir planu entrega iha fulan-Maiu lae inisiu fulan-junu,” nia dehan.
Ministra Saúde, Élia dos Reis Amaral, hateten konstrusaun edifísiu pediatria andár lima iha Hospitál Nasionál Guido Valadares (HNGV) daudaun ne’e atinje ona 70%, tanba ne’e iha tempu badak empreza China Civil Engineering Construction Corporation (CCECC) sei entrega ba Governu no sei bele utiliza.
“Progresu ba oin ha’u hanoin la’o ona. Iha semana rua liuba ne’e, ita iha 68%. Ha’u hanoin agora ita iha ona mais 70% resin,” Élia dos Reis Amaral hateten ba jornalista sira hafoin partisipa iha reuniaun Konsellu Ministru iha Palásiu Govenu.
Nia dehan, daudaun ne’e sira akompaña hela instalasaun oksijéniu no ba iha instalasaun ekipamentu médiku no naun médiku sira, nune’e bele utiliza ona.
“Ita mós hein akompaña mós instalazaun oksijéniu ho mós ba iha instalasaun ekipamentu médiku no naun ekipamentu médiku, ne’ebé mak ita espera katak iha tempu badak ita sei halo instalasaun. Atu nune’e, ami sei informa fali ba ita-boot sira bainhira mak bele entrega no bele utiliza ka operalizasaun ba iha ospitál refere. Kona-ba ekipamentu daudaun ne’e iha hela prosesu nian laran,” nia dehan.
Konstrusaun edifísiu pediatria andar lima iha HNGV ne’e konstrui husi empreza China Civil Engineering Construction Corporation (CCECC) ne’ebé Governu Konstitusionál da-ualu (VIII) liuhusi Ministériu Saúde kontrata ho orsamentu hamutuk millaun $9,5.
Jornalista : Felicidade Ximenes
Editór : Cancio Ximenes
