DILI, 11 Marsu 2026 (TATOLI) – Retalista sira iha postu abastesimentu kombustivel iha Dili hasa’e folin gazolina no gazóleu dezde sábadu semana kotuk tanba empreza fornesedora Esperansa Timor Oan (ETO) no Pertamina Internasionál aumenta folin mina, ne’ebé liga ho konflitu iha Médiu Oriente.
Jerente Estasaun Kombustivel 68 Hudi-Laran, Amândino da Costa Guterres, hateten folin kombustivel sa’e ne’e tanba empreza importadora sira hasa’e folin maka retalista sira fa’an hodi ajusta tuir presu ne’ebé sira sosa.
“Mina folin sa’e la’ós ami mak naran hasa’e, maibé ami hasa’e depende ba ETO no Pertamina Internasionál. Iha ne’ebá sira hasa’e, ami mós hasa’e”, Amândino Guterres katak ba Tatoli, ohin.
Kona-ba kombustivel ne’ebé sira faan stock tuan ka foun, jerente ne’e lakohi fó komentáriu, nia dehan atu responta ba estock tuan ka foun ne’e so ETO no Pertamina Internasionál mak bele fó resposta.
Antes ne’e, postu kombustivel 68 Hudi-Laran fa’an gazolina litru ida $1.16 no agora $1.30, ba gazóleu $1.25 no agora $1.40.
Iha sorin seluk, Jerente Borala Fuel, Jenídio Guterres, hateten razaun folin kombustivel sa’e ne’e depende ba folin mina husi fornesedór sira.
“Mina ami foti husi Pertamina Internasionál folin sa’e entaun ami fa’an mós hasa’e folin. Iha loron 06 Marsu ba kotuk ita fa’an folin sei normál litru ida $1.10 no gazóleu $1.22, maibé agora gazolina sa’e ba $1.23 no gazóleu $1.40”, nia informa.
Tuir observasaun jornalista Tatoli, estasaun kombustivel sira iha kapitál hasa’e folin mina ho diferensa entre postu ida postu seluk. Iha postu abastamentu Realistis iha Balide no Manleuana, gazolina antes ne’e $1.17 ba litru ida no agora sa’e ba $1.27, no gazóleu antes $1.20, agora sa’e ba $1.39.
Iha postu abastamentu ETO iha Hali-Laran no Fatuhada, gazolina antes $1.09, agora sa’e ba $1.19, enkuantu gazóleu $1.19 sa’e ba $1.3. Iha sentru abastamentu ETO Mandarin, gazolina antes $1.12 agora sa’e ba $1.23, gazóleu $1.23 sa’e ba $1.35.
Hafoin halo observasaun iha sentru abastamentu sira iha Dili, jornalista Tatoli tenta atu halo entrevisat ho Diretór-Ezekutivu ETO, Nilton Gusmão, no dirijente Pertamina Internasional kona-ba folin mina sa’e, maibé parte rua seidauk bele fó komentáriu tanba okupadu ho serbisu.
Lembra katak, Diretór-Ezekutivu ETO, Nilton Gusmão, antes ne’e hateten katak empreza nu’udar importadora ba kombustivel garante stock ba transporte públiku no privadu iha Timor-Leste to’o fulan haat nia laran.
Nia subliña katak funu iha médiu oriente sei lori impaktu boot ba atividade petrolífera iha mundu tomak, tanba refinaria barak maka depende ba mina matak husi país médiu oriente nian. Maibé, ba Timor-Leste daudaun kombustivel sufisiente hela no folin mós sei normál.
“Ha’u fiar kualker krize sempre iha nia solusaun ne’ebé ita labele pániku. Ami-nia mós kontinua komunika ho fornesedór sira atu asegura kombustivel ba ita-nia rai, nune’e atividade la’o nafatin. Husu ba públiku mantein kalma, labele iha espekulasaun. Ha’u hanesan importadór garante katak husi ohin ba to’o fulan haat mai oin ita laiha problema”, nia asegura.
Notísia relevante: ETO garante stock kombustivel sufisiente to’o fulan haat
Jornalista: Arminda Fonseca
Editora: Maria Auxiliadora
