DILI, 17 Marsu 2026 (TATOLI)—Embaixadór Rúsia ba Timor-Leste, Serrgei Gennadievich halo vizita kortezia ho Ministru Defeza Kontra Almirante Donaciano do Rosário da Costa Gomes Pedro ‘Klamar Fuik’ hodi ko’alia kona-ba estabelese kooperasaun hanaran ‘kooperasaun umbrela ho Timor-Leste iha domíniu defeza.’
“Señór Embaixadór Sergei sai Embaixadór Rúsia mai iha Indonézia akumula ho Timor-Leste, ohin halo vizita kortezia, ne’ebé ami ko’alia kona-ba kooperasaun entre Timor-Leste ho Rúsia, ami konkorda ona atu estabelese akordu protokolár ida depois define atividade saida-saida de’it mak atu halo,” Ministru Defeza hato’o hafoin enkontru iha Kuartél Jerál FALINTIL-Forsa Defeza Timor-Leste (F-FDTL), Fatuhada, Tersa ne’e.
Governante ne’e esplika, parte rua sei halo akordu protokolár atu define saida de’it mak konstitui interese husi parte rua, iha ámbitu bilaterál, multilaterál no Asosiasaun Nasaun Sudeste Aziátiku (ASEAN, sigla portugéz)
Ministru rekoñese, Rúsia nudar país amigu, dezde tempu ne’ebé difísil liu iha Timor-Leste nia luta ba libertasaun.
“Iha tinan 1975 to’o 1999 no husi 1999 to’o ohin loron Rúsia sempre hamutuk ho Timor-Leste. Apezar husi imi hatene katak mundu la’o tuir nia lala’ok, maibé rai hotu, idaidak ho nia prinsípiu ne’ebé mak bele partilla, ne’ebé mak ita partilla ho sira hanesan mós sira partilla ho sira,” nia akresenta.
Notísia relevante : Fransa-TL konkorda fortalese kooperasaun bilaterál iha área defeza no seguransa
Governante ne’e dehan, prinsípiu ba direitu internasionál no direitu umanu mak valoriza nasaun ki’ik sira-nia soberana ka rai boot iha direitu hanesan rai riku ka rai kiak hothotu lhanesan.
“Tanba ne’e mak Rúsia hanesan rai boot no rai ponténsia ida, nia mai iha ita-nia rai ne’e tanba nia hakarak metin hamutuk ho ita, hametin ita-nia kooperasaun baze kooperasaun ne’ebé mak solidaridade ne’ebé sira iha ho ita. Dezde uluk iha ho ita no agora ba dezenvolvimentu nasionál ein partikulár dezenvolvimentu iha área defeza,” nia katak.
Embaixadór Rúsia ba Indonézia no Timor-Leste, Segei Gennadievich, hato’o agradese ba Ministru Defeza ne’ebé bele simu ona nia prezensa.
“Tanba ne’e, ohin ami atu kontinua promove kooperasaun ne’e ho Timor-Leste iha área kooperasaun militár no kooperasaun iha área teknika. Ami mós diskute kona-ba kestaun balun ne’ebé ami hamutuk atu halo kooperasaun,” nia hato’o.
Diplomata Rúsia ne’e hateten, iha okaziaun ne’e mós ko’alia kona-ba situasaun geopolítika mundiál ne’ebé akontese turbulénsia no nakonu ho problema.
“Maski nune’e ho okaziaun ne’e ami ko’alia hodi kontinua promove relasaun biliaterál ba independénsia, igualdade, soberania, determinasaun no labele iha intervensaun,” nia katak.
Jornalista : Natalino Costa
Editora : Julia Chatarina
