OEKUSI, 16 Marsu 2026 (TATOLI) – Organizasaun Internasionál CARE Hatutan hamutuk ho Diresaun Rejionál Edukasaun no Solidariedade Sosiál, Rejiaun Administrativa Espesiál Oekusi Ambeno (RAEOA), segunda ohin, hala’o enkontru forma ekipa Taskforce atu implementa Programa Atensaun Proteina (APRO) ba eskola 65 iha Oekusi.
Jestora Programa Atensaun ba Proteina iha CARE Hatutan, Joana Maria Viegas, informa, implementasaun Programa Atensaun Proteina ba eskola sira iha RAEOA, hanesan programa kontinuasaun maibé iha programa referidu fornese de’it produtu fore-rai nu’udar suplementu proteina ba estudante sira iha eskola.
Aleinde ne’e, Programa Atensaun Proteina mós sai programa ida ba nutrisaun eskolár, atu kombate ra’es-badak, ne’ebé dezeñu hodi apoia estudante sira-nia kresimentu no aprendizajén iha eskola, nune’e mós ekipa CARE ho edukasaun Oekusi sei halo monitorizasaun ba saúde eskolár no ijiéne iha kada eskola.
“Programa ne’e ita implementa iha área rua – ida iha munisipíu Ermera iha postu Administrativu Atsabe kobre eskola 19, área kobertura boot iha Oekusi tanba kobre sub-rejiaun tolu: Pássabe Nítibe no Oésilo no kobre eskola 65, ho atividade prinsipál fornese suplementu proteina mak fore-rai ba alunu sira, hanesan iha Programa Hatutan dahuluk fornese, foos, koto, mina no seluktan,” nia hateten.
Programa ne’e, tuir jestora ne’e hetan apoia fundu husi Governu Austrália liuhusi programa DFAT.
Notísia relevante:Autoridade RAEOA no CARE introdús matadalan hodi garante implementasaun merenda eskolár
Diresaun Rejionál Edukasaun no Solidariedade Sosiál, Vincêncio Cono, orgullu maske misaun Programa CARE Hatutan termina iha Juñu 2025, tanba hetan apoia husi doadór sira hodi kontinua implementa programa nutrisaun iha Oekusi.
“Enkontru ohin ne’e, nia objetivu atu forma ekipa avaliasaun monitozasaun ba progresu implementasaun Programa Proteina husi CARE, ne’ebé enkontru ne’e mós hanesan avaliasaun ida, liliu ba armazein, koziña, ensinu aprendizajén tenke la’o, bee-moos iha eskola tenke iha, saneamentu ijiéne no preparasaun produtu lokál sira, ne’e mak ohin konvida mós diresaun agrikultura. Ne’ebé, ita agradese tanba CARE nia programa maske termina iha tinan kotuk, maibé kontinua nafatin hafoin hetan suporta husi parsériu sira,” nia orgullu.
Notísia relevante:Care International kontinua implementa programa HATUTAN
Entretantu, partisipa iha enkontru forma ekipa ne’e mai husi Diresaun Rejionál Agrikultura, Departamentu Serbisu Água Saneamentu (SAS), Diresaun Saúde, inspetór eskolár sira inklui kargu xefia sira iha serbisu edukasaun Oekusi.
Jornalista: Abílio Elo Nini
Editór: Rafael Ximenes de A. Belo
