DILI, 16 Marsu 2026 (TATOLI)—Ministru Ensinu Superiór, Siénsia no Kultura, Jose Honório, no Diretór Ezekutivu Milennium Challenge Account Timor-Leste (MCA-TL), Embaixadór Constâncio da Conceição Pinto, akompañada husi Vise-Ministra Finansa, Regina de Jesus Sousa, entrega (handover) ekipamentu ka asset MCA-TL nian ba Ministériu Ensinu Superiór, Siénsia no Kultura (MESSK) atu utiliza.
Diretór Ezekutivu MCA-TL, I.P., Embaixadór Constâncio da Conceição Pinto, hateten akordu ne’e atu transfere asset ne’ebé MCA-TL iha ba MESSK.
“Asset ne’e hanesan karreta, komputadór, laptop, meza, kadeira, armáriu, ne’ebé sei transfere ba MESSK atu utiliza hodi fó kontinuidade ba projetu ne’ebé MCA-TL dezenvolve durante tinan hirak nia laran,” nia dehan ba jornalista sira iha salaun MESSK, Kolmera, Segunda ne’e.
Constâncio haktuir, iha 2019, MCA-TL hahú dezenvolve proposta projetu challenge ho objetivu ida atu fasilita formasaun ba profesór sekundáriu liliu iha área teknolojia informasaun, língua no metodolojia hanorin atu hadi’a kualidade.
Nune’e, husi projetu referidu, Ajénsia Dezenvolvimentu Amerikanu fó kontribuisaun millaun $420 no Timor-Leste kontribui millaun $54 ba projeitu rua mak projetu challenge edukasaun no saneamentu.
“Maibe, infelizmente, iha 2025, Prezidente Estadu Unidu Amérika, Donald Trump, kansela projetu referidu. Nune’e, ita la konsege atinje ita-nia objetivu ida-ne’e. Tan ne’e, ami halo transferénsia asset ba ministériu relevante. Depoiz semana oin ami sei halo asinatura no transferénsia asset sira-ne’e mai ministériu,” nia tenik.
Conceição Pinto esplika razaun atribui asset sira ba MESSK tanba MESSK mak na’in ba projetu challenge.
Iha fatin hanesan, Ministru Ensinu Superiór, Siénsia no Kultura, José Honório da Costa Pereira Jerónimo promete sei utiliza ekipamentu ne’e ho di’ak no mós sei distribui tutan ba institutuisaun tuteladu sira.
“Ekipamentu hirak-ne’e hanesan ekipamentu Estadu nian ne’ebé ami promete sei utiliza ho di’ak no ho responsabilidade tomak,” Ministru José tenik.
Aleinde ne’e, MESSK mós sei fahe ekipamentu ne’e tuir kbi’it no situasaun ba institutuisaun tutelada sira-ne’ebe presiza duni atu utiliza hanesan Universidade Nasionál Timor Losora’e (UNTL), Institutu Nasionál Siénisa no Teknolojia, Ajénsia Nasional Avaliasaun Akreditasaun no Akadémika (ANAAA), Institutu Kafé Ermera no Institutu Politékniku Timor-Leste (IPTL)
Ministru José Honório subliña bainhira ekipamentu hirak-ne’e entrega ona ba ministériu, no ministériu atu distribui ba institutuisaun tutelada sira, sei informa ba ministériu finansa no patrimóniu estadu tanba konsidera ekipamentu ne’e hanesan Estadu nian.
Portantu, Vise-Ministra Finansa, Regina de Jesus Sousa afirma programa referidu Amérika deside la kontinua, nune’e tenke konklui asset sira-ne’ebe durante ne’e sai hanesan asset ba MCA-TL ba ministériu relevante.
“Depoiz ofisializa no entrega ekipamentu, ami-nia ekipa sei halo servisu tanba ita-boot sira hatene katak patrimóniu ne’e hanesan ona ministériu relevante nian, maibé ita tenke iha rejistu atubele relata mós informasaun sira-ne’e ba ita-nia relatóriu sira ba Kámara Konta, Parlamentu Nasionál atu promove tranparénsia,” Vise-Ministra Finansa dehan.
Biban ne’e, Vise-Ministra Finansa apela ba ministériu relevante atu kuidadu ekipamentu hirak-ne’e, no bainhira atu handover ba entidade tutelada sira, bele informa mós ba patrimóniu estadu.
“Tanba ita iha sistema ida-ne’ebé bainhira handover husi MESSK ba fali UNTL ka IPTL nia naran ita sempre muda iha rejistu patrimóniu estadu nian, entaun dadus sira-ne’e ita tenke relata ho loloos,” nia hakotu.
Entretantu, Diretór Projetu Edukasaun MCA-TL, Isménio Martins da Silva relata lista patrimóniu ne’ebé atu entrega kompostu husi kareta Toyota Hilux ida, Laptop 10-resin, meza no kadeira ho modelu oioin, sofa ida, armáriu ba servisu nian iha modelu haat, komputador, CPU, video komferénsia.
Jornalista: Osória Marques
Editór: Xisto Freitas da Piedade
