VIKEKE, 17 Marsu 2026 (TATOLI)—Xefe Suku Bibileo, Postu Administrativu Vikeke Vila, Munisípiu Vikeke, Moises Pinto, informa Programa Nasionál Dezenvolvimentu Suku (PNDS) ba 2026 Suku Bibileo fó prioridade ba konstrusaun estrada rurál (modelu beton) atu populasaun asesu.
“Programa PNDS ba tinan ida-ne’e ami autoridade hamutuk ho populasaun Suku Bibileo deside prioridade ba infraestura bázika liliu ba konstrusaun estrada beton iha ami-nia suku laran, atu fasilita movimentu populasaun,” Moises Pinto dehan ba TATOLI iha Postu Vikeke Vila, Tersa ne’e.
Autoridade Suku Bibileo ne’e dehan, durante ne’e estrada iha Suku Bibileo laran, iha tempu udan tahu mak nakonu hodi difikulta populasaun la’o ain no transporte sira.
“Tan ne’e, programa PNDS ami tau ba estrada hodi fó benifísia ba ita-nia populasaun iha Suku Bibileo. Estrada ne’ebé ami konstrui modelu beton ne’e sei benifísia ita-nia populasaun husi aldeia ualu (8),” nia akresenta.
Nune’e, nia dehan, estrada ne’ebé konstrui ba beton hamutuk metru 800, ne’ebé sei gasta orsamentu hamutuk rihun $24.
“Ami-nia planu beton klaru ona ba estrada metru 800, maibé depende ba kustu orsamentu ne’ebé aloka ba ami. Se implementa mak orsamentu la to’o, ami sei redús estrada balun,” nia dehan.
Entretantu, estrada referida sei benifísia populasaun iha Suku Bibileo ho totál aldeia hamutuk ualu (8) kompostu husi Aldeia Aisahe, Amarleza, Balide-Oan, Fato-Hosan, Hare-Oan, Laco-Uai, Mane-Klaran no Webae. Totál populasaun 3.156 resin.
Jornalista: Vitorino Lopes da Costa
Editór: Xisto Freitas da Piedade
