OEKUSI, 18 Marsu 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), liuhusi Diresaun Rejionál Edukasaun no Solidariedade Sosiál, aloka rihun $500,209.92 hodi implementa Programa Merenda Eskolár faze dahuluk tinan-2026 nian ba loron efetivu 64.
Diretór Diresaun Rejionál Edukasaun no Solidariedade Sosiál Oekusi, Vincêncio Cono, esplika, tuir loloos Programa Merenda Eskolár implementa ona iha inisíu Janeiru 2026 maibé atraza iha relatóriu, ne’ebé submete husi kada estabelesimentu ensinu sira.
“Fundu ba programa Merenda Eskolár, daudaun ne’e iha hela faze transferénsia orsamentu ba iha konta bankaria ba eskola sira, hamutuk rihun $500-resin, hodi finansia ba loron efetivu 64, iha etapa dahuluk ne’e,” Diretór Diresaun Rejionál Edukasaun no Solidariedade Sosiál, Vincêncio Cono, hateten iha Oekusi, ohin.
Notísia relevante:RAEOA devolve fundu merenda eskolár rihun 138-resin ba kofre Estadu
Diretór ne’e esplika, Programa Merenda Eskolár ne’e, nu’udar faze dahuluk ba tinan 2026 ba efetivu 64, atu implementa iha primeiru períodu to’o segundu períodu, tanba ne’e bazea ba kaléndariu programa merenda eskolár ba eskola públiku no privada sira, ne’ebé ho nivél ensinu báziku inklui mós eskola pré-eskolár sira.
“Kauza atraza implementasaun ba tinan ne’e, tanba relatóriu husi eskola balun seidauk submete, ida-ne’e de’it mak labele halo transferénsia, maibé agora relatóriu submete ona, ne’e mak atu hahú fali implementasaun,” nia hateten.
Ezekutivu ne’e esplika, manuál implementasaun nafatin tuir Ministériu Edukasaun nian, katak kada alunu konsumu sentavu $0,42 kada loron ida, fahe ba rua, sentavu $0,7 koloka ba administrasaun, utensíliu, bee no ai-maran ne’ebé jere husi parte koziñeiru sira, $0,35 ba estudante sira atu konsumu ai-han.
Notísia relevante:Merenda Eskolár iha Oekusi kumpre padraun nutrisaun
Entretantu, fundu orsamantu Programa Merenda Eskolár $500,209.92 hodi fahe ba eskola Ensinu Báziku Sentrál (EBC, sigla portugés) 11, mak hanesan EBC Palaban hetan $108,057.60, EBC Boboloa hetan $29,057.28, EBC Mekosikaloti hetan $65,721.60.
Nune’e mós EBC Tula-Ika Aenmat hetan $48,625.92, EBC Oésilo hetan $52,631.04, EBC Tasaebeno hetan $23,331.84, EBC Pássabe hetan $49,566.72, EBC Baoknana hetan $34,245.12, EBC Haobeno hetan $47,953.92, EBC 3 Santo António Oekusi hetan $14,407.68 no EBC Pássabe hetan $26,611.20
Jornalista: Abílio Elo Nini
Editór: Rafael Ximenes de A. Belo
