DILI, 18 Marsu 2026 (TATOLI)—Ministru Interiór, Francisco da Costa Guterres, husu ba aplikante vaga membru foun Polísia Nasionál Timor-Leste (PNTL) hanesan manifestante sira atu mantein kalma no hein rezultadu serbisu husi Komisaun Supervizaun.
“Sira hatene rezultadu foin lalais fó sai ona katak ita iha hela kondisaun halo serbisu, sira hein lai, lalika ansi, depoizde komisaun halo serbisu mak sei fó rezultadu mai Governu, katak ita hein iha semana oin sira hato’o ona relatóriu ne’e mai para depois iha Governu foti desizaun tuir rekomendasaun,” Ministru hato’o ba Jornalista sira, iha Palásiu Governu, Kuarta ne’e.
Notísia relevante : Paulo Assis Belo lidera Komisaun Supervizasun ba rekrutamentu membru foun PNTL 2025
Nia dehan, Komisaun Supervizasun foti hotu xave sira atu la’o tuir buka dokumentu sira.
“Ne’ebé sira iha loron hira nia laran ne’e sei hakerek sira-nia relatóriu ikus depois semana oin propoin mai Governu,” nia akresenta.
Governante husu ba kadetis foun, karik hakarak sai Polísia tenke disiplina hodi hein hein desizaun.
“Hein rekomendasaun husi komisaun, depois Governu sei foti desizaun tuir rekomendasaun. Porke ita ba estrada la rezolve problema, ita hatene ona sira-nia ezijénsia uluk sira reklama ne’e mak komisaun atu halo, agora mai fali saida tan, serbisu seidauk hotu, ne’e laiha baze ida,” Ministru katak.
Nia dehan, Reitór Universidade hakerek ona karta ba Polísia hodi dehan labele disturba apredizajen tanba rezolusaun Governu iha ona, katak fó hela tempu ba Komisaun atu halo buat ne’ebé loloos.
Governante defende, komisaun ne’ebé Governu forma iha kbiit, haree ba ninia kompozisaun.
“Ha’u sei la hasoru manifestante sira, ha’u hasoru sira atu ko’alia saida tanba prosesu sei la’o komisaun sei halo nia serbisu. Ha’u kuandu hasoru sira, ha’u atu promove saida ba sira. Ha’u kuandu pronúnsia buat balun ne’e ha’u hafraku ka hamate komisaun nia serbisu,” nia katak.
Jornalista : Natalino Costa
Editora : Julia Chatarina
